1- Gilla Alla tagaayno huunde fuu tafon, na woodi bi'eteedo Haala. 2- Haala kaan na wondi e Alla. Kam du woni Alla. Kanka wondi e Alla gilla fuddoode. 3- Alla tagirii huunde fuu e Haala kaan. Huunde tagaande fuu laataaki si wanaa e makko. 4- E Haala kaan nguurndam yuuri. Kokkoowo nguurndam kam waddanta yimbe annoora. 5- Annoora na yayna ley nimre, de nimre ndeen waawaay nyifude ka.
6- Alla nelii gorko gom na wi'ee Yuhanna. 7- Golle makko wo seedanaade. Nafaa wargol makko ya wo faa o seedanoo annoora kaan. Seedaango ngoon wo faa yimbe fuu kooloo ka saabe ko o haali. 8- Kanko o wanaa annoora kaan, de o warii faa o seedanoo annoora kaan, 9- sabu kanka woni annoora goongalaaha, ka wari ley adunaaru faa yaynana yimbe fuu.
10- Bi'eteedo Haala oon wonnoo ley adunaaru. Alla tagirii adunaaru e makko, de yimbe anndaayno wo o moy. 11- O warii ley ndewgu makko, de yimbe makko njabaay o. 12- De wobbe mabbe kaa njabii o, koolii ko o woni du. O hokkii be laawol, o hokkii be baawde laataade bibbe Alla. 13- Hooliibe been laataaki bibbe Alla hono no yimbe adunaaru miilortoo noon. Hono no be laatorii bibbe Alla dey, wanaa ibe ndimaa e lenyol ngol Alla subii, wanaa du hono no gorko e debbo kawrita ndima neddo, wanaa e muuyde neddo du, de be laatoroke bibbe Alla e nguurndam kesam dam Alla hokki be.
14- Haala kaan laateke bii Aadama, imo joodinoo hakkunde meeden, keewdo e njingu e yurmeende e goonga. Min ndaarii no o teddiri ni. Teddeengal makko ngaal wo hono ngal biddo mo honom walaa, yuurdo e Alla Baabiiwo jeyi.
15- Yuhanna seedeneke o wi'i : O'o wonnoo mo mbiimi oon : O waran gada am de imo buri kam manngu, imo wonnoo gilla mi wonaay.
16- En fuu en kebii barke keewdo e njingu e yurmeende, en kebii barke dow barke. 17- Laawol dartiingol kaa, Alla hollii en dum e Dewte annabi Muusaa na wi'ee Tawreeta, de njingu Alla e yurmeende muudum e goonga fuu, e Isa Almasiihu yuurata. 18- Alla kaa abada neddo yi'aay dum, de biyiiko mo honom walaa, gondudo e makko faa be ngoni gooto, kam saabanii en anndude o.
19- Mawbe Alahuudiya'en ley Urusaliima nelunoo mawbe almaami'en e lewinko'en faa be yamowa Yuhanna dume woni golle muudum. 20- Nde be njottinoo fuu, o salaaki jaabaade be, o laabini bernde makko e yeeso yimbe fuu, o haalanii be ko Laamdo anndini o fuu, o wi'i : Miin kaa, mi wanaa Almasiihu. 21- Be yami o katin : Wo a moy ndelle ? Wo a Eliya ? O wi'i : Mi wanaa. Ndelle wo a annabaajo mo min kedii oon na ? O wi'i o wanaa. 22- Ndelle aan wo a moy, faa min keba min kaalanowa nelube min. Dume mbi'ataa e kabaaru hoore maada ? 23- Yuhanna nootii wi'i : Miin woni mo annabi Esaya winndi haala muudum ley Dewte Annabaabe wi'i :
Daande goddo na feeko ley seeno manngo na wi'a : Omtanee Alla laawol dartiingol e berde moodon.
24- Ley nelanoobe warbe to makko been na woodi Farisiya'en. 25- Been keddinoo na yama o na mbi'a : Aan a wanaa Almasiihu, a wanaa Eliya, a wanaa annabaajo oon, ko wadi de ada wadira bawtisima e ndIyam ni ? 26- Yuhanna nootii be wi'i : Miin, mido wadira bawtisima e ndiyam, goonga, de na woodi ley yimbe moodon do'o neddo burdo kam teddude de on anndaa wo o moy. 27- Neddo oon na sakitoo kam de miin kaa mi fotaa faa'e habbitinde boggi
pade makko.
28- Dum wadaaynaa ley hibeere Baytaniya, lettugal maayo Urdun, toon Yuhanna wadirta bawtisima.
29- Jaangoore majjum Yuhanna yi'i Isa na wara fara muudum o wi'i : Inan jawgel ngel Laamdo sakki en faa ngel waree de ittana en hayyeeji adunaaru fuu. 30- O wi'i : gorko o'o mbi'annoomi sakitoto kam de imo buri kam manngu, imo wonnoo gilla mi wonaay. 31- De faysi mi anndaayno moy woni kanko, mi warii mido wada bawtisima. Sabaabu wargol am wo faa Alla faamdina en o.
32- Yuhanna seedii katin wi'i : Mi yi'i Poowle Alla yuuri dow kammu hono wuugaandu jamuuru na njippoo dow Isa. 33- Tafon mi anndaano moy woni kanko de Alla neludo kam faa mi wadira bawtisima e ndiyam, kam wi'i kam mi yi'an Poowle Alla na njippo na keddo e goddo. Neddo oon woni gadoowo bawtisima, kam wadirta dum e Poowle Alla. 34- Miin kaa mi yi'i dum fuu wadii, mi seedeke, kanko woni bii Alla.
35- Jaangoore majjum Yuhanna na wondi e taalibbe muudum dido katin. 36- Nde o yiinoo Isa na yaha fuu, o wi'i : Inan jawgel Alla. 37- Taalibbe dido yuhanna been nani haala kaan be ndunnyi be njokki Isa. 38- Nde be njokkunoo Isa fuu, yeeyii yi'i be njokki dum yami be : 39- Dume pilotodon ? Be mbi'i o : Rabbi, Dum e haala men wo Moodibbo, be yami o : Toy woni njoonnde maa ? 40- O wi'i be : Ngaree faa nji'on. Be njehi, be keddodii e makko e ko heddii e nyalooma oon. Ndeen wo yamnde nay ko hakkunnaange faltorii. 41- Hakkunde taalibbe dido nanunoobe haalaaji Yuhanna de njokkunoo Isa been, gooto mabbe na wi'ee Andire. Oon wo minyiwo Simon Piyer. 42- Nde o tawoynoo mawniiko Simon ndeen o wi'i dum : Min nji'ii Almasiihu, maana majjum e haala gereke wo Amiiru mo Alla subii. 43- O yaari oon to Isa. Isa ndaari imo wara wi'i : Aan wo a Simon, bii Yuhanna, ko faltii joonin a noddirte Kefas. Dum wi'etee Piyer e ley haala gereke, e haala meeden wo hayre).
44- Jaangoore muudum Isa na yinnoo yaade fara ndewgu Galili, o tawi Filipa o wi'i dum : War jokkam. Filipa Baytisayda jeyaa, wuro Andire e Piyer. 45- Filipa tawi Natanayel o wi'i dum : Min nji'i mo annabi Muusaa e annabaabe kaalannoo haala muudum ley Dewte diina. Kanko woni Isa, neddo Nasaratu, bii Yusufu. 46- Natanayel wi'i sallaa huunde lobbere na waawi yuurude ley Nasaratu na ? Filipa wi'i : war ndaaru.
47- Isa yi'i Natanayel na wara o haali haala muudum, o wi'i : Inan neddo isira'ilaajo lobbo mo jammba walaa e muudum na wara. 48- Natanayel yami o : Noy wadi de anndudaa kam ? Isa nootii wi'i : Gilla Filipa noddaay ma mi yi'ii ma ada sori ley lekki, ada miiloo Alla. 49- Natanayel fudditi haala wi'i : Mobbo am, aan woni bii Alla, aan wo a amiiru Isira'iila. 50- Isa wi'i : ko mbiimaami mi yi'iino ma ada sori ley lekki to'o, duum tan wadi de a hooleke kam joonin kaa ? A yi'an ko buri dum manngu sanne. 51- Mi haalanan on : dum wo goonga : On nji'an kammu na udditii, maleyka'en Alla na yee^ira na jipporoo e he'am hono dow tangarawal. Miin woni Mawniiwo Tageefo.
1- Tataberde majjum, bangal wadii ley hibeere Kana ndewgu Galili. De inna Isa du e golle bangal ngaal woni. 2- Kaa Isa e taalibbe muudum du noddaama ngara faa potta e bangal ngaal.
3- Be tawi wakkati oon, yimbe bangal been kantii njaram mubben mbodejam daam. Inna Isa wi'i dum : Hey, njaram mabbe timmii. 4- Isa nootii wi'i : Accaa hayye debbo mawdo o, dume tiiganimaami joonin ? Miin kaa wakkati am waraay tafon. 5- Wakkati muudum fuu inna Isa wi'i golloobe bangal been : Ko o wi'i on fuu ngadon. 6- Loode kaaye jeegom tawaama doon. Loonde wootere fuu na hooya lokuuje capande nay. Loode deen Alahuudiya'en lootorto faa laaba e diina mubben. Isa wi'i golloobe been : Ngattee de'e ndiyam faa de keewa. 7- Golloobe bangal kebbini loode de faa de keewi. 8- Isa wi'i : Ittee njaram dam seeda njaaron dam to mawdo bangal. Be itti dam be njaari dam to mawdo bangal oon. 9- Mawdo bangal nyedi njaram daam seeda meedi wi'i bangudo o noddee. Kanko kaa o anndaa sallaa ndiyam dam waylitaa njaram mbodejam,de golloobe been kaa na anndi wo kanjam waylitaa njaram. 10- Nde ba^udo oon yottinoo e makko fuu, o wi'i : Hey gorko a wadii huunde leebunde. A accii yimbe fuu njarii faa paltini de a neldii min njaram burdam welde.
11- Bangal ngaal, ley hibeere Kana ndewgu Galili wonnoo fuddoode Isa e gollude golleji (e) kaayniidi. Ni wadi de o holli yimbe been teddeengal makko. De taalibbe makko du njabii o.
12- Baawo majjum, Isa e innam e taalibbem e minyiraabem fuu be njehi ley hibeere Kafarnahum, be njoodii toon balde seeda.
13- Juuldaandu mawndu nyannde Alahuudiya'en kewtunoo ko'e mubben badeke. Nyannde ndeen Isa yehii Urusaliima. 14- O naati misiide mawnde Alahuudiya'en, o tawi nde wadaama suudu luumo, o tawi soottoobe na'i e baali, yimbe wobbe na mbattita kaalisi e soottoobe pooli, dum fuu ko neddo ittirta sadaka muudum. 15- Nde o yiinoo dum fuu o hooyi boggi o sirbi be o riiwi be, kambe e baali mabbe e na'i mabbe fuu. O sankiti kaalisi wattitoobe, o hippi taabawal mabbe, 16- o haaldi e soottoobe pooli o wi'i be : Ittee dum do'o. Taa ngadee suudu Baabam ndu suudu luumo.
17- Ndeen taalibbe makko been miccitii dum na winndaa ley Dewte. Ko winndaa : Alla, moyyingol suudu maada ngol tuuyii kam faa do maayanmi.
18- Ardiibe Alahuudiya'en kooyi haala mbi'i : A wadi hoore maa mawdo. Dume kollataa min huunde haayniinde faa min paama ada woodi baawde ada woodi laawolmoyyingol majjum. 19- Isa nootii wi'i be : Libee misiide nde'e, de on paaman miin, ley balde tati umminirammi nde. 20- Alahuudiya'en mbi'i o : Misiide nde'e kaa nyibtanooma ley duubi capande nay e jeegom de aan mbi'aa ada waawi umminirde nde balde tati. 21- De be paamaay ko Isa haali, sabu wanaa haala misiide nde'e Isa Haali. Ko o wi'i : Libee misiide mawnde nde'e duum, o maandinii hoore makko e mayre. 22- Nde o iirtoytoo hakkunde maaybe, taalibbe makko du miccitoyto o haaliino haala ka'a. Be njabii ko winndaa ley Dewte, be njabii ko o haalunoo duum fuu.
23- Ley juuldaandu Mawndu nduun, Isa wonnoo ley Urusaliima, yimbe heewbe mbi'i njabi o sabu ko o wadata golleeji kaayniidi. 24- De Isa le hoolaaki be faa'e sabu na anndi be fuu. 25- O haanaa seedineede haala gooto fuu sabu kanko e hoore makko imo anndi ko woni ley bernde bii Aadama.
1- Goddo na wonnoo ley Farisiya'en arande, oon wo mawdo Alahuudiya'en gooto, innde makko Nikodemu. 2- Jemma gom o yehi to Isa. Nde o yottinoo to Isa fuu o wi'i : Moodibbo, min nji'i golleeji maada kaayniidi, miden anndi aan wo a baajotoodo yuurdo to Alla, sabu miden anndi walaa fuu baawdo gollude kaayniidi di ngollataa di si wanaa Alla hokki dum. 3- Isa nootii o wi'i : Goonga kaalanammaami, si neddo rimtaaka kesum waawaa naatude laamu Alla. 4- Nikodemu nootii o wi'i : Noy mawdo wadirta de rimee katin ? Waawaa yeccaade ley reedu yaayem de rimee ya. 5- Isa nootitii wi'i : Goonga kaalanammaami, si wanaa neddo tuuba rimee e ndiyam bawtisima, wadee keso e poowle Alla, si wanaa noon fuu waawaa naatude laamu makko. 6- O haali katin o wi'i : Mo bii Aadama rimi woyran hono no bii Aadama woyri, mo Poowle Alla ndimi du woyran hono no Poowle Alla ngoyri. 7- Taa dum haayne. Mi haalanii ma : On fuu kanaa ndimitodon kesum. 8- Ndaa, henndu na wifa e muuyde muudum, ada nana duko mayru, de a hunngi faamde to ndu yuurata, a hunngi faamde to ndu hucci. Ni Poowle Alla nga'i : Hono ni neddo na yi'ee rimaama kesum de faamataake noy Poowle Alla wadi dum.
9- Nikodemu nootii o wi'i : Noy dum waawi laataraade ? 10- Isa nootii o wi'i : Aan woni moodibbo, jom anndal ley ndewgu Isira'iila de a anndaa dum na ? 11- Goonga kaalanamaami. Min kaalataanaa huunde ko min anndi. Min nji'ii ko min ceedotoo. 12- Onon le on njabataa seedaango am sabu on njabataa ko tindinanmi on. De ko tindinanmi on wo kulle garooje e leydi de teddaa tan. Noy ngatton ndelle de mi tindina on kulle tiidde faameede yuurde dow kammu. 13- Neddo fuu abada yahaay dow si wanaa Mawniiwo Tageefo yuurdo e Alla.
14- 15- De Mawniiwo Tageefo kaa, maandinaama e annabi Muusaa. Arande annabi Muusaa wannii mboddi njamndi bili dum e leggal darni dum ley seeno manngo faa ndaardo ndi fuu dada. Hono noon Mawniiwo Tageefo bildetee e leggal taa kooliido dum fuu halkee de heba nguurndam keddotoodam saabe muudum. 16- Sabu Alla yidii yimbe adunaaru faa sakkanii be biyum mo honom walaa faa waree, taa kooliido dum fuu halkee de heba nguurndam keddotoodam. 17- Alla neldaay biyum ley adunaaru ndu faa o saroo yimbe ya. O neldaaynaa biyiiko o faa yimbe fuu keba wondude e makko saabe muudum. 18- Neddo fuu kooliido biyiiko o harminataake e to Alla, de mo hoolaaki dum kaa harminaama how sabu hoolaaki kanko woni bii Alla mo honom walaa.
19- Inan do harmingol fuddi. Annoora warnoo to yimbe, de yimbe cubii wuurde ley nimre sabu golleeji mubben mboodaa. 20- Neddo fuu golloowo ko boni yidaa annoora ka faa'e, sabu na hula golleeji muudum nji'ee nyalooma beccum. Golloowo ko boni yidaa badaade e annoora. 21- Gadoowo ko moyyi waran e annoora faa golleeji muudum nji'ee paamee wadirii di saabe Alla.
22- Isa e taalibbe muudum njaadi ley ndewgu Yahuudiya toon, o heddodii e mabbe imo wadira bawtisima e ndiyam. 23- 24- Ndeen fuu Yuhanna nanngaaka faa wattee ley kasu tafon.Kam du na wadira bawtisima e ndiyam ley wuro Aynon, dakkol Salima, sabu gooruuji e lugge ndiyam na keewi doon. Yimbe na ngara na ngadee bawtisima.
25- Taalibbe Yuhanna seeda puddi hitundurde e Alahuudiya gooto dow lootogol diina. 26- Be njehi to Yuhanna. Nde be njottinoo e makko fuu, be mbi'i : Moodibbo, ada miccitoo a holliino min lettugal maayo Urdun gorko gom gondunoodo e he'maa. Wanaa aan a haalii haala makko a mawninii o na ? Inan nii o'o joonin kaa, kanko du imo wada bawtisima faa yimbe fuu to makko njahata. 27- Yuhanna jaabi be wi'i : Bii Aadama fuu hebataa faa'e ko Alla hokkaay dum, sakko teddeengal. 28- Onon du odon mbaawi seedanaade kam ko kaalumi mi wanaa Almasiihu, de wo mi nela yeeso muudum.
29- Ko woni e haala amin ka'a wo ka maandinaa e haala bangal : bangudo kam jeyi mo ba^i. Yiigoo bangudo kaa, na tawaa dakkol doon na hettindii. Imo seyi sabu o nanan haalaaji ba^udo ceyooji o. Yuhanna beydi dow majjum wi'i : Hono bernde welnde ndeen wo miin. Mi seyodeke joonin kaa. 30- Na haani teddeengal Isa ngal yalta, ngal am ngaal duytoo.
31- Yuuroowo dow, kam woni dow meeden. Yuuroowo leydi du, wo bii Aadama tan. O haalan haalaaji leydi di teddaa. Yuuroowo e Alla, kam woni dow meeden fuu. 32- Ko o yi'i e ko o nani, kanjum o seedotoo, de yimbe heewbe njabaay seedaango makko. 33- De jabudo seedaango makko oon jabi ko Alla haalata fuu wo goonga, o jabi faa dum laateke seedaango makko jonkaa e yeeso yimbe fuu. 34- Nelaado Alla, haalaaji Alla haalata sabu Alla hebbinii o Poowle muudum faa heewi. 35- Alla na yidi Biddo o, hokkitii o baawde muudum fuu. 36- Kooliido Biddoohebi nguurndam keddotoodam. Neddo fuu koyfindo biddo o hebataa nguurndam daam, de yiite Alla heddotoo dow muudum faa abada.
1- 3- Farisiya'en nani Isa na heba yimbe faa buri Yuhanna. Katin du imo wadira bawtisima e ndiyam. De dum kaa wanaa noon sabu faa'e gooto o wadanaay bawtisima, taalibbe makko tan ngadata.
4- Nde Isa nannoo ko be mbi'ata fuu, o dillidi e taalibbe makko, o yehi leydi Galili. Faa o yaha toon, imo jeyi rewde ley ndewgu Samariya'en.
5- Be njehi faa be ngari wuro gom na wi'ee Sikar. Dakkol toon wonnoo ngesa Yaakuba nga hokkunoo biyum Yusufu. 6- Dakkol ngesa doon woyndu Yaakuba na doon. Isa joodii dakkol woyndu doon sabu o ronki kanko e jahaangal makko. Wakkati oon wo hakkunnaange.
7- 8- Taalibbe makko been du njehi ngenndi faa cooda nyaamdu. Wakkati majjum, debbo samariyaajo wari faa yooga. Isa wi'i o : Hey, debbo o, kokkaraakam ndiyam mi yara. 9- Debbo Samariyaajo oon nootii o wi'i : Hey gorko, wanaa wo a Alahuudiya na ? Noy wadi de ada jaba rookaade kam ndiyam faa njaraa, miin debbo Samariyaajo ? Wakkati oon Alahuudiya'en e Samariya'en ndewraa faa'e. 10- Isa nootii o wi'i : Si ada anndunoo moyyere Alla e dookiido ma ndiyam faa yara, aan e hoore maada a rookoto joomum hokkete ndiyam kokkoojam nguurndam keddotoodam. 11- Debbo oon wi'i o : Moodibbo, a walaa lokuure nde cafiraa, woyndu nduun na luggi du, noy ngattaa de kebaa ndiyam ilam daam. 12- Maamiiwo amin Yaakuba ronnii min woyndu ndu'u, kanko e hoore makko o domditii ndiyam woyndu ndu'u, e bibbe makko e kulle makko fuu. Ndelle ada miiloo ada buri Yaakuba manngu na ? 1 seedataa e domka, de jardo ndiyam dam kokkammi dum domdataa abada. Ndiyam dam kokkammi dum laatoto e ley muudum hono ilam kokkoojam nguurndam keddotoodam. 15- Debbo o wi'i : Moodibbo, hokkaram ndiyam dam taa mi domda katin, taa mi yooga katin abada do'o.
16- Isa wi'i debbo o : yahu noddoy gora de ngardon. 17- Debbo nootii wi'i : Mi walaa goriiwo. Isa wi'i o : A haalii goonga ko mbiidaa a walaa goriiwo 18- sabu a wadii goriraabe njoyo de gorko mo ngondudaa joonin oon wanaa gora. Dum kaa wo goonga.
19- Ndeen debbo o wi'i : Moodibbo, mi annditii wo a annabiijo. 20- Mbaajodaa kam faa wooda ndelle, noy wadi de maamiraabe amin dow waamnde nde'e be njetta Alla de onon Alahuudiya'en mbiidon to Alla yettetee wo Urusaliima. Aan le dume mbiidaa e majjum ? 21- Isa nootii o wi'i : Hoolam debbo o, wakkati waran de wanaa dow waamnde nde'e, wanaa Urusaliima Laamdo yettetee. 22- Onon Samariya'en odon njetta Alla mo on anndaa de minen Alahuudiya'en min njettan Alla, miden anndi o sabu nguurndam keddotoodam hokkiraama e Alahuudiya'en. 23- Wakkati gom waran, wakkati oon yotteke joonin kaa, yettoobe Alla goonga e goonga, kamben njettiran Alla saabe berde mubben e goonga, sabu yettoobe hono been Alla filotoo. 24- Alla yi'ataake de na maatanee e ley bernde. Yettoobe Alla du na kaani yettirde dum saabe berde mubben e goonga.
25- Debbo oon nootii o wi'i : Mido anndi Almasiihu waran, Almasiihu e haala gereke Amiiru mo Alla subii o wi'etee. 26- Nde o wari fuu, o tindinan min kulleeji diina fuu. Isa nootii wi'i : Miin, kaaldoowo e maada o'o, miin woni kanko.
27- Wakkati oon taalibbe Isa yuurii ngenndi toon ngartii. Ko Isa haaldata e debbo o'o dum haaynii be sanne, de gooto mabbe fuu suusaay yamude o ko wadi imo haalda e debbo o'o, naa dume o haajaa e oon.
28- De debbo o yoppi loonde muudum doon, warti ley ngenndi haalaani yimbe fuu : 29- Ngaree ndaaron gorko gom haaltani kam golleeji am di ngadumi fuu, tayte wo Almasiihu. 30- Yimbe been mburtii ngenndi na ngara to Iisa. 31- Nde be ngarannoo ndeen, taalibbe Isa be keddii na mbi'a : Moodibbo, nyaam seeda. 32- Isa le nootii be wi'i : Mido woodi nyaamdu ndu on anndaa. 33- Taalibbe makko keddii na miiloo hakkunde mubben na mbi'a sallaa goddo waddani o nyaamdu. 34- Isa haalani be wi'i : Miin kaa nguureeji am wo mi barkinan gidaale neludo kam,mi yottina golle mo o hokki kam mi wada. 35- De Isa maandini yimbe waroobe been e gese benndude faa tayee nannee. O wi'i taalibbe makko been : Onon kaa, odon mboowi wiide : Lebbi nay gese ngatta tafon de tayee. De mi wi'an on : bantee gite moodon ndaron, gese de fuu benndi faa tayee de nannee. 36- Hono no golloowo golle gese seyortoo si ngesa muudum woodi tayi, nanni ley beembal, hono noon golloowo golle Alla seyortoo si na yi'a yimbe duudbe na naata laamu Alla. Noon wadata de puddudo gese e timmindo dum kawrita ceeyodoo. 37- Noon wadata du de banndol laatoto goonga ngol wi'a : O'o na aawa, o'o na taya. 38- Mi nelu on tayon ngesa nga on aawaay wobbe aawi nga de onon du on ngari on kebdii e mabbe ley golle mabbe oon.
39- Baawo debbo o haalani be ko Isa haalannoo ko woni e muudum fuu, yimbe heewbe wuro ngoon been kooleke o. 40- Nde be kewtunoo e makko fuu, be ndookii o o heddoo do e mabbe. Isa heddodii e mabbe balde didi. 41- Katin o beydi hooleede faa buri nde debbo o haalunoo haala makko ley wuro toon ndeen. Joonin kaa be kooleke o saabe waaju makko oon. 42- De hooliibe o saabe waaju makko been na mbi'a debbo oon : Joonin kaa wanaa ko kaalandaa min duum saabanii min hoolaade o, joonin kaa minen, e ko'e amin, min nani ko o waajii, midon anndi kanko wo o kisinoowo adunaaru.
43- Nde balde didi deen kibbunoo fuu, Isa dilli wuro ngoon. 44- Kanko e hoore makko arande o haaliino banndol ngol na wi'a : Annabaajo hettindanaaka ley leydi baabiraabe muudum (Tindinoore : Maana banndol ngool wo yimbe hawtube e makko wuro been njabataa yallaa wo o annabiijo. Tindinoore timmii do'o). Duum saabanii o yaade ndewgu Galili. 45- Nde o yottinoo Galili toon ndeen, yimbe heewbe njabbiteke o faa woodi, sabu kambe du be njehiino Juuldaandu Mawndu Urusaliima, be nji'i ko Isa wadi toon golleeji kaayniidi.
46- Wo nii wadi de o warti to o waylitinnoo ndiyam njaram mbodejam, ley hibeere Kana ndewgu Galili.
Dakkol toon, sarwinsinke mawdo na joodi ley hibeere Kafarnahum. Suka sarwinsinke oon sellaa. Nde o nannoo Isa dillii leydi Yahuudiya faa wara leydi Galili ndeen, 47- o wari to muudum o rooki dum wara wuro makko danna suka makko inan na maaya. 48- Isa nootii o wi'i : Onon kaa, abada on koolataako si on nji'aay golleeji kaayniidi sanne. 49- Sarwinsinke o wi'i : Moodibbo am, war suudu am gilla cukalel am maayaay. 50- Isa nootii wi'i : Ayyo, yah e yaadu maa. Suka maa dadii nyaw muudum, wuuran jonkaa. Gorko o hoolii ko Isa wi'i dum o runnyi, 51- o hucci wuro. Nde golloobe makko kayninoo imo wara fuu, be kawri e makko, be kaalani o : Suka maada oon dadii. 52- O yami be wakkati oye samtani suka am o'o ? Be nootii be mbi'i yamnde go'o kee^an nde hakkunnaangefaltinoondeen, jontere ndeen dilli e makko. 53- Ndeen baabiiwo oon miccitii wakkati oon pay Isa wi'i dum suka maa dadii nyaw muudum. Kanko e yimbe makko fuu be ngondini oon.
54- Ni woni didobal makko ko o yuuri ndewgu Yahuudiya o warti ley Galili o wadi katin golle haayniido.
1- Baawo majjum kawrital juulde wadii ley Urusaliima. De wo Alahuudiya'en ngadi kawrital ngaal, kaa yimbe fuu njehii, de Isa tawaa kam du e yahube been. 2- Tawi kokuwol piiltiingol Urusaliima na wondi e naayrugal na wi'ee naayrugal baali. De tanakuure na dakkii doon na wi'ee Baytijata. De tanakuure ndeen wi'aakanaa na sawra nyaw fuu. De tanakuure ndeen du na wondi e dande joy kummbiraade kaaye e simitti na piilii dum fuu. 3- De nyawbe been na cori ley dande deen, na kuufi ndiyam tanakuure daam. Ndeen nyawbe been wo bonnguube e wumbe e wooybe (Tindinoore : ibe ndoomi faa ndiyam daam dimmboo, 4- de si ndiyam daam dimmbeke fuu, artiido naadde fuu wo kam dadata nyannde ndeen kaa. Tindinoore timmii do'o).
5- 6- Isa tawi nyawdo gooto mo sawraakano de annditi o'o kaa booyti e nyaw nguun sanne. O wi'i oon sallaa na jaba sawreede na ? Oon kaa nyawrii duubi capande tati e jeetati. 7- Nyawdo oon nooti wi'i : Moodibbo, miin kaa mi walaa mo walla kam naatude ley tanakuure to'o. Nde mbiimi mi wallitan hoore am tan fuu, yimbe artan kam nde ndiyam daam dimmbaa fuu. 8- Isa wi'i o : Umma hooyu daago maa de njahaa. 9- Wakkati oon pay nyawdo oon dadi. Ummii hooyi daago muudum dillidi.
10- Ndeen mawbe Alahuudiya'en nji'i o imo roondii daago makko yaade. Nyannde ndeen wo ^ootteteende. Be mbi'i : Nyannde ^ootteteende ada golla na ? Laawol diina meeden jabataa neddo golla nyannde ^ootteteende faa roondoo daago muudum. 11- Dannaado e nyaw muudum oon nooti wi'i be : Wanaa miin wadi. Wo dannud kam oon ni wi'i kam mi hooya daago am mi yaha. 12- De be mbi'i : Moy won oon ? 13- De dannaado oon anndaa wo o moy sabu yimbe heewbe wonube doon ndeen been uddi oon de dilli.
14- Faa booyi seeda, Isa hawri e makko ley misiide Alahuudiya'en mawnde ndeen, de wi'i o : Hey, hettinda ga faa mi haalane. A dadii jonkaa ? Woodi, tinna taa wadu hayyeeji katin, sabu si a wadi hayyeeji katin fuu, goddum nanngitete faa bura ko arande duum bonde. 15- Gorko o'o yehi to mawbe Alahuudiya'en been, wi'i be : Mi annditii cawrudo kam wo Isa. 16- Be puddi torrude Isa joonin kaa sabu ko o sawri nyawdo nyannde ^ootteteende mabbe. 17- Isa nootii be wi'i : Faa hannden Baabam Alla walaa nde ^oottata, de miin du mide golla. 18- Dey Alahuudiya'en ko bernani o faa na piloo ittude yonki makko saabe ko o lutti no be ngadirata nyannde ^ootteteende mabbe duum e ko o wi'i Baabiiko wo Alla duum. Joonin kaa be mbi'i o fonndii hoore makko e Alla.
19- Isa hooyi haala nootii be : Mi haalanan on, dum wo goonga : Biddo waawaa faa'e e hoore muudum si wanaa to Bammum yuuri. 20- Alla na yidi biyum, dum wadi ina holla dum ko gollata fuu sabu du, huunde fuu ko Biddo yi'i Bammum na wada kam du wadan duum. Katin Baabiiwo hollan Biyum ko buri dum manngu o wada duum, faa dum haaynoo on. 21- Baabiiwo na itta maayde e neddo faa laaba watta nguurndam e muudum. Hono noon Biddo du wattirta nguurndam be yidani. 22- Baabiiwo kaa roondataa gooto fuu hayyeeji muudum'en, de o hokkii Biyiiko baawde e laawol yowude di dow gadoowo di fuu. 23- Dum fuu, faa heba yimbe teddina Biyiiko hono no teddinirta o. Neddo fuu mo teddinaay Biyiiwo teddinaay Baabiiwo neludo dum du.
24- Mi haalanan on, dum wo goonga : Kettindiido haalaaji am de hoolii neludo kam hebii nguurndam keddotoodam. Kam kaa jukkataake sabu falteke majjaangal wari e ley nguurndam keddotoodam. 25- Mi haalanan on, dum wo goonga : Wakkati waran, wakkati oon yotteke joonin kaa mo maaybe halkube nanan daande Mawniiwo Tageefo. De si nanii daande ndeen njabii, kamben kaa mbuurii. 26- Sabu baawde hokkude nguurndam woni e Baabiiwo de yayranii Biyum nguurndam daam faa wona e muudum. 27- Katin du o yayreneke Biyiiko baawde saraade yimbe, sabu kam woni Mawniiwo Tageefo. 28- Taa dum haaynoo on, wakkati warowan mo maaybe uwaabe nanoyta daande Bii Alla. Ndeen be fuu be mburtoto ley cabeeje mabbe. 29- Jokkube laawol dartiingol fuu irtinoyte keban nguurndam lobbam, jokkube ko dartaaki du, kamben du irtinoyte njukkee.
30- Miin kaa walaa fuu ko ngadammi e hoore am, mi sarataako e hoore am du, ko nanmi Alla na haala duum carortoomi. Sariya am du wo dartiido sabu mi filataako ko njidumi de ko neludo kam yidi, duum ngadammi.
31- Si mi seedenekeno hoore am, mi wi'ii mido woodi baawde, ko mbiimi on fuu jamnataako. 32- De goddo ceedotoodo ko ngondumi, kam fakontoo kam on. Miin kaa mido anndi ko o haalata e he'am fuu wo goonga. 33- De onon kaa, on nuliino yimbe to Yuhanna faa o anndina on ko waajibii e he'am. 34- De miin e hoore am, seedaango bii Aadama nafataa kam. Ko saabi de kaalmi dow Yuhanna dey, wanaa faa nafa kam, de wo faa njabon seedaango muudum kebon keddotoodam. 35- Yuhanna wonnoo hono fitilla kubbaado na yayna laawol dartiingol. On fuu odon njidi waaju muu0um. On njabi on ceyokeno wakkati seeda e annoora fitilla oon de on njabaay jokkude ko o haali. 36- De miin, mi hollan on ngo seedaango burngo fakanaade kam hono ngo Yuhanna holli on ngoon. Golleji di ngadammi, diin pay Baabam hokki kam mi wada, diin pakontoo kam. Diin kollan Baabiiwo neli kam du. 37- Katin, Baabam neludo kam, e dow fakanaade kam o haalan. De onon le, abada on nanaay daande makko, on nji'aay yeeso makko. 38- Baawo on koolataako mo o neli, on tiigataako haalaaji muudum, di naataay berde moodon du. 39- Ko saabanii on on celataa janngude binndi di, wo sabu odon miiloo di kokkan on nguurndam keddotoodam. De won ko keddudon e haala majji kaa wo kanji pay kaalata ko ngondumi. 40- De faysi njanngudon di, on paamdaay di. Ko hollinta on paamdaay di dey, on njabaay jokkude kam faa kebon nguurndam nafoojam.
41- Taa on miilee teddeengal yuurungal to yimbe jokkubekam pilotoomi. 42- De ko kaalmi duum, sabu mido anndi on, mido anndi on ngalaa njingu Alla. 43- Mi waririi e muuyde Baabam de on njabaay kam, de si goddo warii e muuyde muudum fuu, on njaban duum kaa. 44- Ko weli on fuu wo teddundureede, de on pilataako teddengalyuurngal to Alla gooto. Noy wadata ndelle de koolodon ?. 45- Taa miilee mi funcitan on e yeeso Baabam. Wo Muusaa, mo keppudon ko haalunoo oon, kam funcitata on. 46- Sabu si on koolekeno Muusaa goonga e goonga, on kooloto kam, miin du, sabu o winndi kabaaru am fuu. 47- De wo on koolaaki ko o winndi duum. Noy wadata ndelle de koolodon haalaaji am ?
1- Baawo majjum Isa yehi lettugal maayo galili, wobbe na mbi'a maayo Tiberiya. 2- Tawi yimbe heewbe njokkii o sabu ko be nji'i golleeji makko kaayniidi di o gollata, o sawri nyawbe. 3- 4- Wakkati oon tawi juulde nyannde Alahuudiya'en kewtunoo ko'e mubben badeke. O yehi o joododi e taalibbe makko dow tilde. 5- O banti gite makko o yi'i yimbe na ngara to makko faa heewi de o yami Filipa o wi'i : Noy ngatten faa nyaamnen yimbe be'e fuu ? 6- Ko o yamiri dum dey, faa o ndaartindoo oon sabu, kanko e hoore makko imo anndunoo noy o wadirta. 7- Filipa jaabii o wi'i : Faynde kedden buudi ujunaaje teemede didi keyataa faa'e seeda. 8- Taalibbo makko gooto na wi'ee Andire, oon wo minyiwo Simon Piyer, kam wi'i : 9- Suka gorko gooto na woni hakkunde mee0en do'o, oon na jogii buruuje alkama joy e liyyi didi, de dume dum nafata en e yimbe heewbe hono be'e ?
10- Isa nootii wi'i taalibbe muudum been : Kaalanon be be njoodoo do'o. Tawi nokku oon na heewi hudo. To be njoodii doon be tawi wo be ndagu worbe ujunaaje njoyo e rewbe e sukaabe. 11- De Isa hooyi buruuje deen, yetti Alla tafon, de fuddi hokkude joodiibe been. O hokki be liyyi du faa mono fuu hennyi. 12- be fuu be nyaami faa be kaari de o wi'i taalibbe makko taa been mbonna ko heddi duum be kawrundura fuu. 13- Be kawrunduri ko be keddi e buruuje joy deen fuu faa heewi cagiije sappo e didi.
14- Nde yimbe been fuu njiinoo golle kaayniido mo Isa wadi o'o, be mbi'i kanko woni annabiijo mbi'anoodo na wara e adunaaru oon pay. 15- De Isa annditii e hoorem be ndooldan dum faa be ngada dum amiiru mabbe, o dilli o yoppi be, o yehi dow tilde kanko tan.
16- Nde alaasara warnoo fuu, taalibbe Isa sappo e dido been, njippii ngari juurdude maayo doon. 17- Be naati laana ndiyam faa be peyyita maayo ngoon, be njaha Kafarnahum. be tawi jemma fuddii naatude. Ndeen fuu, Isa hewtaay be tafon. 18- Tawi henndu mawndu wadii. Maayo ngoon fuu heddii na wada bempenye mawde e semmbe. 19- Tawi be ndorbeke laana kaan faa fuddii woddaade dow maayo ngoon kilooji joy naa jeegom. Be nji'i Isa na yaha dow ndiyam na fonndii to mabbe, de be annditaay o. Kulal naati be sanne. Dum fuu Isa na wara e mabbe faa battitii e laana kaan. 20- Ndeen Isa wi'i be : Taa kulee, wo miin. 21- Kulal mabbe dilli faa be mbi'a Isa wara joodoo ley laana toon. De wakkati gooto laana meemi leydi. Tawi be njotteke to be ponndii doon.
22- Jaangoore muudum fuu, yimbe nyaamnanoobe heddiibe gere ooto maayo ngoon been, be taykitii wo laana ngooto tan wonnoo doon. be nji'iino taalibbe sappo e dido tan naati ley makka, de Isa kaa naataay. Kambe tan ndilli. 23- Wakkati muudum laanaaji goddi yuurdi Tiberiya njottii dakkol to Isa yettunoo Alla doon, doon kambe du be nyaamnoo buuru. 24- Nde jamaa oon ndaarunoo yi'aay Isa, yi'aay taalibbe muudum been du ndeen, be fuu be naati ley laanaaji yuurdi Tiberiya diin, be kucci Kafarnahum faa be pilowoo Isa.
25- Nde be njiitoynoo Isa gere o'o to maayo ngoon ndeen, be mbi'i : Moodibbo, ndey njottidaa do'o ? 26- Isa nootii be wi'i : Mi haalanan on, dum wo goonga : on piloto kam de wanaa saabe maanaa golleeji am kaayniidi diin pilortodon kam de wo saabe ko nyaamnodon buuru faa paltindon duum. 27- Taa ciinee hebude nyaamdu ndu booyataa, de ciinee hebude nyaamdu booyooru ndu wuurna on nguurndam keddotoodam. Nyaamdu nduun wo Mawniiwo Tageefo hokkata on dum sabu kam woni kisinoowo mo Alla subi wadi maande muudum e makko du. 28- Be yamtindii o : Noy min ngadata de min ngada golleeji di Alla muuyi faa min keba ko booyata ? 29- Isa nootii be wi'i : Golle mo Alla hedorii on oon, koolodon mo o neli. 30- Be yami o katin : 31- Binndi annabaabe kollii min maamiraabe amin artinoobe nyaamii conndi ley seeno manngo. Ko winndaa : O hokkii be be nyaamii buuru yuurdo dow kammu. Aan le golleeji kaayniidi diye mbaawdaa wadande min du faa min nji'a di de min koole ? 32- Isa nootii be wi'i : Mi haalanan on, 0um wo goonga, on paamaay binndi diin. Wanaa Muusaa hokki on buuru yuurdo dow kammu wo baabam kam hokkata on buuru yuurdo dow kammu mo honom walaa. 33- Sabu buuru mo Alla hokkata oon wo yuuroowo dow kammu jippoo faa nafa e yimbe adunaaru fuu, hokkan dum'en nguurndam keddotoodam. 34- Be mbi'i o : Ayyo Moodibbo, si wo noon kokkaa min buuru oon nyannde fuu ndelle. 35- Isa haalani be wi'i : Miin woni buuru nafoowo nguurndam oon. Neddo fuu kabbiido e he'am hoolii kam yolbataa domdataa faa abada. 36- De mi wi'ii on : Faysi njiidon ko ngammi duum, on koolaaki kam. 37- Neddo fuu mo Baabiiwo reyni kam e moodon oon habbotoo e he'am. Kabbotoodo e he'am oon, mi riiwataa dum faa abada. 38- Sabu mi jippeke ley adunaaru faa mi wada muuyde neludo kam, mi wadataa faa'e e muuyde am.
39- Inan ni muuyde neludo kam : Yimbe be o reyni kam been, taa mi acca gooto mabbe fuu halkee, de mi faltina be e maayde mi wartira be e nguurndam nyalaande sakitotoonde. 40- Muuyde Baabam kaa wo ndaardo biddo de hoolii dum fuu heba nguurndam keddotoodam. Min kaa mi faltinan dum maayde mi wartira dum e nguurndamnyalaande sakitotoonde.41- Alahuudiya'en nyo'i na kaala haala Isa sabu o wi'i kanko woni buuru yuuroowo dow kammu jippoo. 42- be mbi'unduri hakkunde mabbe : Neddo fuu na anndi kankowoni Isa bii Yuusufu tan, midon anndi baabiiko e inniiko fuu. Noy wadata ndelle de o wi'a kanko yuuri dow kammu ? 43- Isa nootii be wi'i : Celee nyo'ude e haalaaji moodon di. 44- Gooto fuu waawaa habbaade e he'am si wanaa neludo kam fodanii dum.
Ndeen wo miin faltinta dum maayde mi wartira dum e nguurndam nyalaande sakitotoonde. 45- Annabaabe mbinndiino haala ka'a : Yimbe fuu Alla waajotoo be. Duum winndaama e ley Dewte diina. Jonkaa Neddo fuu kettindiido ko Baabiiwo Alla wi'i de jabi waaju muudum habboto e he'am. 46- Ko be mbinndi Alla waajotoo be duum wattaa de neddo yi'a o, yuurudo e Baabiiwo Alla kam tan yi'i Baabiiwo. 47- Mi haalanan on, dum wo goonga : Kooliido fuu heban nguurndam keddotoodam. 48- Isa maandini hoorem wi'i kam woni buuru buurnoowo nguurndam keddotoodam. 49- Maamiraabe moodon faynde be nyaamiino conndi ley seeno manngo be maayii. 50- De nyaamdo buuru yuuroowo dow kammu jippoo oon fuu maayataa. Nii buuru oon woyri. 51- Miin woni buuru yuurudo dow kammu jippii, mo nguurndam keddotoodam yuurata e muudum. Nyaamdo buuru oon fuu wuuran faa abada. Katin du, buuru mo kokkammi oon wo teew banndu am ngu cakkammi faa yimbe adunaaru keba nguurndam keddotoodam.
52- Dow majjum, Alahuudiya'en ngadi kalala sanne be yamunduri hakkunde mabbe : Noy o'o gorko waawiri hokkude teew banndu muudum faa nyaamen ? 53- Isa wi'i be : Mi haalanan on, dum wo goonga, kanaa nyaamon teew banndu Mawniiwo Tageefo, njaron yiiyam muudum, sabu si on ngadaay noon, on nannaay nguurndam e berde moodon. 54- Neddo fuu nyaamdo teew banndu am yari yiiyam am hebii nguurndam keddotoodam. Miin, mi faltinan dum maayde mi wartira dum e nguurndam nyalaande sakitotoonde. 55- Sabu teew banndu am kaa wo nyaamdu goongalaaru, yiiyam am kaa wo njaram goongalajam. 56- Nyaamdo teew am yari yiiyam am wondi e he'am, miin du mi wondan e muudum. 57- Baabiiwo neludo kam na wuuri, dum wadi miin du mide wuuri sabu mi yuuri e makko, hono noon nyaamdo teew am du wuuran sabu yuuran e he'am. 58- Nii buuru yuurudo dow kammu jippii woyri : o wanaa hono mo maamiraabe moodon nyaamunoo de maayi. Nyaamdo buuru oon wuuran faa abada. 59- Nde Isa haalannoo haalaaji di, wo ley misiide Alahuudiya'en wonnoo, na waajoo ley hibeere Kafarnahum.
60- Nde be nanunoo haalaaji Isa diin fuu, taalibbe muudum been heewbe mbi'i : Waaju oon na tiidi hettindaade, moy jabata o du ? 61- Isa e hoore muudum annditii waaju muudum oon haayneke taalibbe muudum been, de o wi'i be : Haala am ka'a suni on na ? Ka nanndaa e ko mboowdon ley adunaaru ndu duum. 62- Wakkati waran nde nji'oton Mawniiwo Tageefo na yeptaa faa yeccoo to wonnoo arande. Wakkati oon, noy ngatton ndelle de taa yiigol majjum suna on. 63- Wo Poowle Alla kamben hokkata nguurndam keddotoodam. Teew adunaaru ndu'u kaa nafataa faa'e e majjum. Haalaaji di kaalumi on diin kanji ngaddata Poowle Alla e nguurndam. 64- De hakkunde moodon du na woodi yimbe seeda be koolaaki. Tawi Isa na anndi gilla e fuddoode kooliibe dum e be koolaaki dum. Imo anndi du jammboytoodo o. 65- O beyditi dow haala kaan faa hannden o wi'i : Duum wadi de nbiimi gooto fuu waawaa jokkude kam si Alla hokkaay dum wune.
66- Illa wakkati oon, taalibbe makko heewbe njeccii gada makko celi yaadude e makko du. 67- Ndeen Isa lamndii taalibbe sappo e dido been : Onon du on ndillan njoppon kam na ? 68- Simon Piyer nootii o wi'i : Joomam min njoppe faa min njaha to moy ? Ada wondi e haalaaji kokkooji nguurndam keddotoodam. 69- Katin du min kooleke min paamii wo a Laabdo yuurdo to Alla. 70- Isa nootii be wi'i : Ndaa, wo miin subii on onon sappo e dido be'e, de faysi cubiimi on, gooto moodon wo Ibiliisa. 71- Ka'a wo haala kaalooha haala Yahuuda bii Simon Isikariyota o haali. Sabu faynde Yahuuda tawaa e ley subaabe sappo e dido been, kam jeyi jammbaade o.
1- Baawo majjum Isa dilli leydi Yahuudiya do wonnoo doon, yehi leydi Galili na waajoo. Sabu ko wadi o muuyaay heddaade leydi Yahuudiya toon dey, hooreebe Alahuudiya'en doon been, o faamii na piloo faa mbara o. Duum saabanii o dillude leydi ndiin. 2- Tawi du, kawrital mabbe na wi'ee Kuurgal badeke, 3- Minyiraabe makko been mbi'i o dilla do o yaha leydi Yahuudiya faa reworbe makko heddiibe toon been du nji'a ko o gollata duum, 4- sabu neddo pilotoodo reworbe muudum annda, huunde ko wondi suudataa. Be mbi'i o katin : Baawo dum ngondudaa ni, ngadaa faa yimbe fuu nji'a.
5- Faa'e minyiraabe makko been du njabaay yallaa wo o Almasiihu. 6- Isa wi'i be : Wakkati am waraay tafon kaa, de onon le, wakkati fuu wo wakkati mon. 7- Sabu onon le yimbe jokkube ko adunaaru mbanyataa on, be mbaawaa du, de miin le, na mbaawi sabu mi suudataa be golleeji di be ngollata diin fuu wo bondi. 8- Njehee naatee kawrital ngaal, miin kaa mi yahataa sabu wakkati yaagol am waraay. 9- Nde o haalnoo haala ka'a ndeen, o heddii leydi Galili toon kanko kaa.
10- Nde minyiraabe makko been njahannoo ndeen, kanko du o yehii, de yimbe kawrital been paamanaay o sabu o annditaaka. 11- Jonkaa hooreebe Alahuudiya'en na ndaara o ley kawrital ngaal, ibe yamundura toy o woni. 12- Yimbe kawrital na kaala sanne haala makko doon. Wobbe na nyo'a na mbi'a : Wo o lobbo. Wobbe na nyo'a na mbi'a : O wooda, wo o majjinoowo yimbe. 13- Kaa ibe kula haalde semmbe sakko hooreebe Alahuudiya'en been paama wobbe na mballita o.
14- Nde o yahannoo ndeen, tawi kawrital ngaal feccirii. O yottii o naati ley danki misiide mawnde ndeen, o fuddi waajaade. l5- Hooreebe Alahuudiya'en been, dum haaynii dum'en : Noy wadi de imo waawri ni waaju de o wanaa janngudo. l6- Isa nootii be wi'i : Wanaa miin e hoore am miilii e hakkillo am de mido waajoo, wo Alla neludo kam oon hokki kam waaju o'o. l7- Kooliido Alla faa na muuya wadude muuyde muudum wo anndudo muuyde Alla. Anndugol ngool saabantoo dum anndintinde yallaa Alla hokki kam waaju oon, naa wo miin e hoore am nii waajoto. l8- Neddo fuu kaaldoowo muuraadu muudum, teddeengal muudum filotoo e hoore muudum. De neddo pilotoodo neludo dum teddinee na haala goonga, fewre fuu walaa e muudum. l9- Onon le, Muusaa hokki on laawol diina. Ko wadi de odon piloo warde kam de on fuu on mboofii on ndewaay laawol ngool. 20- Jamaare ndeen nooti o wi'i : Yallaa nginnaaw bondo nanngi maa na ? Moy haajaa warde ma ? 21- Isa nootii be wi'i : Mi wadanii on huunde wootere nyannde ^ootteteende de dum tan sunii on sanne. 22- De ko saabanii kam wadude huunde nde'e, dum pay saabani Muusaa hokkude on yamiroore haddude worbe, faysi nyannde haddeteende wo nyande ^ootteteende. Duum fuu faa paamon njinngu, kam laami laawol. De ko buri haande, tawee wanaa Muusaa fuddani on haddude, wo maamiraabe Alahuudiya'en been puddani on. 23- Ndelle si on mbaawi haddude gorko nyannde ^ootteteende, ko wadi de on bernanii kam, miin kaa, saabe mi sawrii haddu neddo gooto nyannde ndeen ? 24- Ley bernde moodon on cenndii hakkunde ko dartii e ko dartaaki. De celee senndirde huunde e nooneeji muudum ji'eteedi. Cenndiron dum e maanaa majjum, tawee jammba fuu wadaay.
25- Yimbe Urusaliima seeda na mbi'a : wanaa gorko o'o hooreebe Alahuudiya'en pilotonoo warde ?. 26- Inan ni o'o imo waajoo e ley yimbe fuu de o wi'ataake faa'e. Dum na waawi laataade sallaa joonin kaa hooreebe meeden be annditii wo o Almasiihu. 27- O waawaa laataade Almasiihu sabu eden anndi to o yuurata. De Almasiihu le, nde waroyta fuu yimbe paamataa to yuurata. 28- Wakkakti oon le, Isa ley misiide wonnoo na waajoo. O haaldi semmbe e yeeso yimbe fuu o wi'i : On tennyoreke odon anndi kam, odon anndi to yuuranmi, de on anndaa neludo kam. Wanaa miin waddi hoore am. Neludo kam oon du ko haalata fuu wo goonga, de kam kaa on anndaa dum. 29- Miin kaa mide anndi o sabu e makko yuurmi, katin du, kanko neli kam. 30- Saabe ko o haali duum wobbe na piloo nanngude o, de gooto fuu meemaay o, sabu wakkati nanngeede makko yonaay tafon.
31- Ley jamaare ndeen du yimbe heewbe koolii o. Be mbi'i du sallaa Almasiihu nde warowi wadan golleeji kaayniidi burdi hono di gorko o'o wadi di'i na ?
32- Farisiya'en nani ko jamaa oon nyo'ata hakkunde muudum'en e dow Isa. Farisiya'en been e hooreebe almaami'en itti sordaasiibe njaha nanngowa Isa. 33- Isa wi'i be : mido wondi e moodon wakkati seeda tafon, de mi yeccoyto to neludo kam. 34- On piloyto kam de on nji'itataa kam sabu on mbaawaa yaade to ngonanmi. 35- Alahuudiya'en yamunduri : Toy o yahata de en nji'ataa o ? Naa o yahan ley Alahuudiya'en doggube cankitii naati e yimbe Gereke'en be faa o waajoo be na ? 36- Dume di haalaaji ngari wiide : On piloyto kam de on nji'ataa kam sabu on mbaawaa yaade to ngonanmi ?
37- Nyalaande fuu sakitotoonde kawrital ngaal ndeen, kam buri manngu. Nyannde ndeen Isa ummii yeeso jamaa fuu wi'i : Si neddo domdii wara to am yara. 38- Kooliido kam fuu gooruuji ndiyam kokkooji nguurndam reggan ley bernde muudum. Noon binndi mbi'i. 39- Ko o haali noon duum, faa o maandina ndiyam daam e Poowle Alla. Kooliido fuu heban Poowle deen. Tawi ndeen Poowle Alla kokkaaka hooliibe tafon sabu Isa teddinaaka ndeen tafon.
40- Yimbe ley jamaa been nde nanunoo waaju oon mbi'i : Si goonga ni, neddo o wo annabaajo oon. 41- Wobbe mabbe du mbi'i wo Almasiihu. Beye been du njaabii mbi'i : Hey, noy Almasiihu yuurirta leydi Galili e diina men du ? 42- Binndi kollinii Almasiihu wo lenyol Dawda Almasiihu yuurata, ley hibeere Betelema o yuuroyta du. Toon Dawda joodinoo. 43- Jamaa o rewaay laawol gootol dow Isa. 44- Tawi wobbe mabbe na njidi nanngude o de gooto mabbe fuu meemaay o.
45- Nulaabe Farisiya'en njeccii to nelnoobe be been e to mawbe Almaami'en. Be yami be be nulnoo been, be mbi'i : Ko wadi de on ngardaay e makko ? 46- Nulaabe been nootii be, mbi'i : Abada bii Aadama fuu waajoraaki hono no o waajortoo ni. 47- Be nootii nulaabe mabbe been be mbi'i : Ndelle onon du on accii neddo o'o sarnii on ? 48- Yallaa abada on nji'ii mawdo meeden gooto naa Farisiya gooto hoolii o na ? 49- De yimbe to o waajotoo been kaa be anndaa faa'e e laawol Muusaa, wo be harminaabe.
50- Nde dum wannoo ndeen, Farsiya gooto bi'eteedo Nikodemu wo gondo mabbe. O nanngi haala o wi'i. 51- E sariya meeden, en mbaawaa jukkaade goddo si en nanaay ko haali maa en nji'aay ko wadi. Nikodemu oon wo jahunoodo hiirowi to Isa wakkati paltiido. 52- Farsiya'en nootii o mbi'i : Aan du wo a neddo Galili na ? yahu janngoy binndi, a faaman annabaajo fuu yuuroytaa ley Galili abada.
7.53- Baawo majjum mono fuu hooti ley galle muudum. 1- De Isa kaa yehi dow waamnde. Innde waamnde ndeen wo waamnde ledde oliife nde wi'etee, o waalii toon. 2- Fajiri kecco o warti ley galle misiide Alahuudiya'en. Jamaa oon fuu battitii e makko. O joodii, o fuddi waajaade be. 3- Yimbe moodibaabe e Farisiya'en seeda kawriti ngaddi to makko debbo tawaado na wada jeenu. be ngaddi debbo oon yeeso jamaa fuu. 4- Be mbi'i Isa : Moodibbo, debbo o wo yi'aa na jeena. 5- E ley Tawreeta, Muusaa yamirii en rewbe dagu be'e limmee kaaye faa do maayi. Aan le dume mbiidaa min ngada o. 6- Ko be kaaliri dum le, wo tuugol be tuufani Isa faa be keba sabaabu ko nanngata o e jaabu makko. Ndeen Isa wo turi na diida honndu muudum e leydi. 7- Duum fuu be yamtindoo o. Isa turtii wi'i be : Mo wadaay abada hayyeeji fuu artoo limma o hayre arandeere. 8- O turii katin imo diida e leydi. 9- Nde be nanunoo haala ka'a fuu, be puddi dillude gooto gooto. Burbe fuu duubi been artii. Faa heddii Isa tan yoppaa e debbo oon na darii doon. 10- Isa turtii yam debbo oon : Toy be ngoni ? Naa gooto mabbe fuu tilsinaay sareede maada ? 11- Debbo oon nootii o wi'i : Moodibbo, faa'e gooto tilsinaay. Isa wi'i : Miin du mi sarataako ma. Ayyo, yah e yaadu maada de taa ngadaa hayyeeji katin.
12- Isa haaldi e jamaa oon wi'i be katin : Miin woni annoora adunaaru. Jokkudo kam fuu heban annoora jaynawoowo dum laawol nguurndam, abada yahataa ley nimre. 13- Farisiya'en mbi'i o : A seedonoto hoore maa, ko mbiidaa dum walaa nafa. 14- Isa nootii be wi'i : Wanaa noon, faysi seedaniimi hoore am, ko mbiimi dum wo goonga sabu mido anndi to yuurammi, mido anndi to njahammi. Onon le, on anndaa to yuurammi, on anndaa to njahammi fuu. l5- Fonndugol moodon yimbe wo hono no bibbe Aadama ngool wa'i. Miin le mi fonndataa gooto fuu. l6- Joonin kaa, nde carotoomi fuu, sariya am oon wosataako, sabu wanaa miin tan sarotoo. Baabam neludo kam na wondi e he'am, minen cardotoo. l7- winndaama e ley Tawreeta moodon : Si yimbe dido ceedeke seedaango wooto, seedaango mubben ngoon na nafa. l8- Miin, mido seedanoo ko hoore am. Baabam du na seedanii kam. Mido woodi baawde sedanaade hoore am sabu kam neli kam. l9- Be yamii o be mbi'i : Toy woni bammaa ? Isa nootii be wi'i : On anndaa kam, on anndaa Baabam du, sabu si odon anndunoo kam ni, on anndan Baabam du. 20- Nde Isa haalanoo ndeen, wo ley misiide mawnde wonnoo na waajoo, gere to keesuwal wallinaa de mono fuu na watta sadaka muudum doon.
Faa'e gooto mabbe nanngaay o sabu wakkati nanngeede makko yonaay tafon.
21- Isa wi'i be katin : Mi dillowan de pilowodon kam, de on nji'ataa kam maaydon e hayyeeji moodon. On mbaawataa yaade to njahammi 22- Alahuudiya'en mbi'unduri hakkunde muudum'en : Ndelle o waritoto, sabu o wi'ii en mbaawataa yaade to o yahata. 23- Isa nootiibe wi'i : E ley yimbe adunaaru yuurudon, miin du, dow yuurumi. Onon le, yimbe adunaaru njeyi on de miin, yimbe adunaaru njeyaa kam. 24- Duum saabii de mbiimi on maaydan e hayyeeji moodon, De on maaydan e diin du si on njabaay miin woni bi'aado : kam woni oon. 25- Be yami o : Aan wo a moy du
? Isa nootii be wi'i : Miin woni ko mbiimi on duum gilla e fuddoode. 26- Na heewi ko mbaawmi haalde haala moodon faa mi funcita on. De ko ekitiimi e neludo kam tan kaalananmi yimbe adunaaru. Kam kaa goonga tan haalata. 27- Alahuudiya'en been paamaay sallaa haala Baabiiwo o haalanta be. 28- Isa wi'i be : Ayyo, nde keboydon bildon Mawniiwo Tageefo e leggal fuu, on annditan miin woni oon . On paaman du walaa fuu ko ngadammi miin tan e hoore am, ko Baabam janngini kam tan mbaajotoomi. 29- Neludo kam oon na wondi e he'am, o yoppaay kam miin tan, sabu wakkati fuu mide wada ko o yidi. 30- Baawo Isa waajoreke noon, yimbe heewbe koolii dum.
31- Ndeen Isa wi'i Alahuudiya'en hooliibe dum been : Nde njabudon waaju am on accitaay fuu, on laatoto taalibbe am goongalaabe. Noon wadata de paamon gondudo e goonga. 32- Goongalaajo oon ittan on e maraadi. 33- Be nootii o be mbi'i : E annabi Buraayma min yuuri, abada min laataaki maccube wobbe. Noy mbaawdaa wi'ide min yuwan e maraadi ? 34- Isa nootiibe wi'i : Mi haalanan on, dum wo goonga : Neddo fuu gadudo hayyeeji wo hayyeeji njeyi dum. 35- Maccudo jeyaaka e buudu dimo, biddo tan jeyaa faa abada. 36- Joonin kaa si biddo hewtinii on ko'e moodon, on mbaawaa laataade maccube katin. 37- Mido anndi wo on lenyol Buraayma, de wanaa Buraayma woni bammon pay. Ko hollinta dum dey wo on njabataa waaju am faa odon piloo warde kam du. 38- Miin le ko Baabam holli kam duum mbaajotoomi, de onon du, ko bammon wi'i on, duum ngadoton. 39- Be njaabii o be mbi'i : Maamiiwo amin wo Buraayma. Isa nootii be wi'i : Wanaa noon, sabu si Buraayma wonnoo maammon jaati on ngadan golleeji muudum. 40- De joonin kaa odon piloo warde kam miin, kaalando on goonga ka nanumi e Alla ka'a. Abada Buraayma wadaay ko nanndi hono duum. 41- Golleeji moodon e golleeji maammon jaati oon wo gootum. Be nootii o be mbi'i kambe kaa be nganaa jaali, be nganaa teddinoobe alla'en wobbe. Be fuu be baabiiwo gooto, wo Alla. 42- Isa wi'i be : Si Alla wonnoo bammon, on njidan kam sabu e makko yuurmi, muuyde makko ngonirmi do. Wanaa miin waddi hoore am, kanko neli kam. 43- Ko wadi de on paamataa ko kaalammi on, naa on kokkaaka baawde hettindaade haalaaji am ? 44- Onon kaa, bammon jaati wo Ibiliisa, de odon muuyi wadude golleeji di yidi. Gilla e fuddoode wo o ittoowo yonkiiji. Abada o rewaay laawol goonga, sabu goongantaaku walaa e makko, ko o haali fuu wo fewre, sabu noon o tagiraa. Wo o penoowo. Kanko woni baaba fewre. 45- Miin le, goonga kaalammi, dum saabii de on koolataako kam. 46- Moy e moodon waawi hollude mi wadii hayyeeji ? Ndelle si mi haalanii on goonga, ko wadi de on koolataako kam ? 47- Gondudo e Alla hettindoto haalaaji Alla. De on ngaldaa e Alla, duum saabii on kettindataako.
48- Alahuudiya'en nootii o mbi'i : Min tennyorii joonin kaa miden ngoodi laawol wiide ma wo a Samariyaajo, nginnaaw mbonngu wondi e maada du. 49- Isa jaabii be wi'i : Wanaa fuu nginnaaw wondi e he'am, de wo Baabam ni korsimmi. De onon le, on fuu on caleke yaagaade kam. 50- Ko mbiimi duum wanaa mi filonto hoore am teddeengal. Na woodi pilontoodo kam ngal, kam sarotoo du. (Tindinoore : Alla wo cartoodo Laabdo. Kam anndi moy hebata teddineede. Tindinoore haadi do'o). 51- Mi haalanan on, dum wo goonga : Neddo fuu jabudo haalaaji am duumataako e maayde faa abada. 52- Alahuudiya'en mbi'i tennyorii joonin kaa wo nginnaaw mbonngu wondi e makko : Buraayma maayi, annabaabe du maayii de aan, ada wi'a jabudo haalaaji maa fuu duumataako e maayde. 53- Maamiiwo amin Buraayma maayii, ndelle aan, ada miiloo ada buri Buraayma manngu na ? Annabaabe du maayi. Aan, dume ponndudaa hoore maa ?
54- Isa salii nootaade ko be yami dum de o wi'i be : Sini mi teddinanno hoore am, teddeengal am ngaal nafataa faa'e. Teddinoowo kam oon wo Baabam, kanko woni mo mbi'eton Alla moodon. 55- De on mboowaay o, miin le, mide woowi o. Si mi wi'ii mi woowaa o fuu mi laatoto penoowo hono moodon. Mido woowi o, mido horsini haalaaji makko, mido wuuri e mubben. 56- Buraayma maamiiwo moodon, e hoorem seyo heewii dum wi'ano na jeyi yiide nyalaande nde ngarammi, o yi'ii nde du faa o seyii. 57- Alahuudiya'en nootii o mbi'i : A walaa faa'e duubi capande joy de a yi'ii Buraayma ? 58- Isa jaabii be wi'i : Mi haalanan on, dum wo goonga : Gilla Buraayma rimaaka mido woni. 59- Be ummii be cubi kaaye faa be limma o, de Isa kaa suudi be, yalti ley galle misiide Alahuudiya'en mawnde ndeen toon dilli.
1- Isa na yaha e laawol hawri e gorko dimdaado e mbumndam. 2- Taalibbe makko been mbi'i : Moodibbo o'o le ni rimraa, duum le wo saabe hayyeeji makko, naa hayyeeji saaraabe makko ? 3- Isa jaabii be wi'i : Mbumndam makko daam, waldaa e hayyeeji makko, waldaa e hayyeeji saaraabe makko du. Mbumndam makko daam waraaynaa hollinde yimbe fuu no baawde Alla ngardoyta e majjam. Isa maandini yonki muudum e nyalooma wi'i : 4- Baawo naange yanaay tafon, na haani ngollen golleeji neludo kam. Jemma badeke nde gooto fuu waawaa gollude faa'e. 5- Baawo mido woni ley adunaaru tafon ni, miin woni annoora adunaaru. 6- Nde o haalduno haalaaji diin ndeen, o tuuti tuute e leydi o wadi loofoy seeda o wuji e gite bumdo oon. 7- O wi'i dum yaha sulmowoo ley tanakuure wi'eteende Siloham. Innde Siloham ndeen e ley haala mabbe wo nelaado. bumdo oon yehi sulmowii toon, tan o wumti o hooti imo yi'a. 8- heebe e makko been e yiinoobe o arande mo garbina been fuu keddii na mbi'a : Wanaa gorko o wonnoo do na joodoo na garbina na ? 9- Bee na mbi'a : Wo kanko. bee ga du na mbi'a : Wanaa kanko, wo be nanndu ni. Gorko oon le wi'i be : Wo miin jaati. 10- Heddii be yama o : Noy ngaddaa de mbumtudaa ? 11- O nootii be o wi'i : Wo gorko bi'eteedo Isa, kam tuuti tuute e leydi de wadi loofoy seeda o wuji e gite am, de o wi'i kam mi yaha mi sulmowoo ley tanakuure Siloham. Njahumi. Baawo mi sulmeke tan mbumtumi. 12- be yami o : Toy oon gorko woni ? O nootii be o wi'i o anndaa.
13- Be njaari bumtinaado oon to Farisiya'en. 14- Tawi nyannde Isa wadanno loofoy wumtini o ndeen wo nyannde ^ootteteende. 15- Dum saabanii Farisiya'en been du yamde gorko oon faa o yamee katin noy wadi de wumti. O wi'i be : Oon wadii loofoy seeda, o wujii e gite am. Miin du njaami culmiimi tan kemmi mbumtumi. 16- Farisiya'en seeda mbi'i : Gadudo golle o'o wanaa neddo Alla sabu o teddinaay nyalaannde ^ootteteende. Wobbe mabbe katin mbi'i : Noy neddo gadoowo hayyeeji waawi wadude golleeji kaayniidi hono ko o wadi dum. Baladi mabbe potaay. 17- Be yami o katin : Aan le, dume mbi'ataa kabaaru bumtindo ma oon ? Gorko o'o wi'i be : Wo o annabaajo. 18- Ndeen hooreebe Alahuudiya'en koolaaki sallaa o bumnoodo arande, de joonin imo yi'a. Be njabaay hoolaade faa be nelani yimbe oon been ngara faa be yama dum'en. been ngari. 19- Alahuudiya'en been yami be : O wo biyii'on jaati na ? Odon tennyori nde o rimanoo o wardii e mbumndam ? Dume saabii de jonkaa imo yi'a ? 20- 21- Yimbe makko been mbi'i anndaa ko saabi de mo yi'a jonkaa, de na anndi wo o binngel mubben nii, ni o rimraa. Anndaa moy wumtini o kaa, yamee o, wo o mawdo kanko du. Imo waawi nootaade on. 22- Ko be kaalirta noon wo be kulan hooreebe Alahuudiya'en been. Ndeen fuu, tawi hooreebe Alahuudiya'en been fuu ndewri mbi'i neddo fuu bi'oowo Isa wo kisinoowo, harminee e diina mabbe, hebataa naadde ley misiide katin. 23- Duum saabii yimbe makko been mbi'i : Imo waawi jaabaade on. Wo o mawdo, yamee o. 24- Farsiya'en noddi gorko bumtinaado oon katin mbi'i dum : Kaalaa goonga yeeso Alla. Minen kaa miden anndi neddo o wo gadoowo hayyeeji. 25- Gorko bumtinaado oon nootii be wi'i anndaa sallaa o gadoowo hayyeeji naa o wadataa, de na anndi ni wo bumnoodo de o wumtinii dum. 26- Be yami o katin be mbi'i : Noy o wadiri de o wumtini maa ? 27- O nootii be o wi'i : Mi haalanii on de on kettindaaki kam. Dume ngatton hettindaade kam katin ? Naa onon du on njidu laataade taalibbe makko ? 28- Be njenni o be mbi'i ndelle : Aan du a taalibbo gorko o na ? Minen kaa wo min taalibbe annabi Muusaa. 29- Miden anndi Alla haaldii e annabi Muusaa, de kanko kaa min anndaa faa'e to o yuuri. (Tindinoore : Wakkati majjum Alahuudiya'en na sikka nde Almasiihu warata fuu, Betelema o yuurata. Tindinoore haadi do). 30- Gorko oon du jaabii be wi'i : Ayyo, inan ni ko haaynii. Onon hooreebe diina bee du, on anndaa to o yuuri de miin kaa o wumtinii kam. 31- En fuu, enen anndii Alla hettindataako gadoowo hayyeeji, de na hettindanoo teddinoowo dum e teddinoowo muuyde muudum. 32- Abada en nji'aay to goddo wumtini neddo dimdaado e mbumndam. 33- De si gorko o yuuraay e Alla o waawaa wadude faa'e e majjum. 34- Be nootii o kambe du be mbi'i : Aan a fuu wo ley hayyeeji ngondaa gilla nde ndimenodaa, de ada wi'a a waajoto min ? Be karmini o, be ndiiwi o ley miisiide toon.
35- Isa du naniino bumdo oon riiwraa, wari hawri e makko wi'i o : Ada hoolii Mawniiwo Tageefo na ? 36- O nootii o wi'i : Moodibbo, kaalanaa kam, gorko oon wo moy faa mi heba mi hooloo dum. 37- Isa wi'i o : Kanko ni haaldata e maada joonin. 38- Gorko oon wi'i na hoolii Joomiraado, tukkinii yeeso Isa. 39- Isa wi'i o : Ayyo, mi warii ley adunaaru ndu faa yimbe fuu ceeda laabi. Faa wumbe fuu keba nji'a, miilotobe mbumaay du mbuma. 40- Farisiya'en gom na ngondunoo e makko doon nani ko o haali duum, yami o sallaa kamben du wo wumbe na ? 41- Isa nootii be wi'i : Sini wo on wumnoobe on mboofaay, de baawo on mbi'i odon nji'a, on keddoto wo on woofube faa do njukkedon.
1- Isa wi'i be : mi haalanan on, dum wo goonga : Mo naatiraay e dammbugal hoggo baali de seeki hoggo ngoon naati wo gujjo, wo janoowo. 2- De naayrudo e dammbugal kam woni duroowo goongalaajo baali diin. 3- Doomoowo di oon omtanan dum gampuwal hoggo ngoon. Baali diin na kettindii daande duroowo muudum'en. 4- Mbaalu makko fuu o noddiran dum e innde muudum, o wurtina dum yaasin faa do di kibbi. O ardoo di imo yaha, di njokki o sabu di anndi daande makko. 5- Di njokkataa mo di anndaa daande muudum, de si di nanii daande mo di anndaa fuu di ndoggan dum di mboddowoo e muudum. 6- Isa banndani be banndol de be paamaay ko ngol wari wiide.
7- Isa wi'i be katin : Mi haalanan on, duum wo goonga : Miin woni gampuwal dammbugal hoggo baali diin. 8- Artiibe kam warde fuu wo wuybe wo yanoobe. Baali diin kettindanaaki be. 9- Miin woni dammbugal. Naayrudo fara am heban nguurndam keddotoodam. Hadataake naatude e wurtaade fuu, na reenii na hebi ko wuurda. 10- Ko saabantoo gujjo warde dey, wo nguyka e mbonkaade tan. Miin kaa mi warii faa mi hokka nguurndam dam huunde fuu nyakataa.
11- Miin woni duroowo lobbo. Duroowo lobbo wo soottan yonki muudum dow baali muudum. 12- Neddo fuu duroowo faa yobee wanaa duroowo lobbo. Mo jeyaa baali na dura, nde yi'i huunde ladde mawnde fuu, yoppan di de dogga. Ndeen, huunde ndeen naata e majji nannga goddi majji, sankita di fuu. 13- Kanko du o doggan, sabu yobeede ni o haajaa. O ronkintaa hoore makko e baali diin. 14- 15- Miin woni duroowo lobbo. Baabiiwo anndii kam faa woodi, miin du mido anndi dum faa woodi. Hono no miin e Baabiiwo anndunduri nii, hono noon miin e baali am du anndunduri. Dum saabi mi anniyeke e bernde am soottude yonki am e dow baali am diin. 16- De goddi majji ngalaa ley hoggo ngo. Diin du mido jeyi filowaade dum'en. Di kettindii daande am, di kawrita e coggal am ngal faa di laatoo gootum. Duroowo majji du wo gooto.
17- Baabiiwo oon na yidi kam sabu mi salaaki maayde faa mi heba nguurndam am katin. 18- Gooto fuu ittataa nguurndam am, de miin e hoore am mi soottii dum. Mido woodi laawol, mido woodi baawde soottude nguurndam am, mido woodi baawde hewtude dam katin, dum wo muyde Baabam de yamiri mi wada.
19- Saabe haalaaji makko diin, mawbe Alahuudiya'en potaay laabi. Bee na kooli o, bee njidaa o. 20- Yimbe heewbe be njidaa o been na mbi'a : Ginnaaji mbaylitii hoore makko. Wo o kaa^aado. Taa kettindee haalaaji makko diin. 21- Yimbe kooliibe o been du na mbi'a : Kaa^aado haalataa haalaaji lobbi dartiidi hono di'i. Be mbi'a katin : Yallaa nginnaaw bonngu na waawi wumtinde wumbe na ?
22- Wakkati oon wo dabbunde. Ndeen wo juuldaandu moyyingol misiide mawnde Alahuudiya'en ndeen, nde woni ley Urusaliima. 23- Isa tawaama toon na yiiltoo ley danki simitti misiide mawnde ndeen. Danki kiin Salomon ki wi'etee. 24- Wakkati oon Alahuudiya'en nji'i Isa, kawriti piilti e muudum ibe mbi'a o : Ndey ngarataa ittanaa min sikke amin, kollaa min sallaa wo a Almasiihu, haalan min faa wooda. 25- Isa nooti wi'i be : Mi haalanii on de on koolaaki kam. Golleeji di ngadirmi laawol e baawde Baabam, diin kollata wo mi moy. 26- De onon le, on koolaaki kam sabu on nganaa baali am. 27- Baali am na nana daande am, mido anndi di, di njokki kam. 28- Mi hokkan di nguurndam keddotoodam, abada di mbaatataa. Gooto fuu teetataa di e junngo am. 29- Sabu ko Baabam hokki kam duum, na buri huunde fuu haande ndaareede. Baawo majjum, huunde fuu waawaa teetude di e junngo muuduum. 30- Miin e Baabam fuu wo min gootum.
31- Katin Alahuudiya'en kooyi kaaye faa limma o. 32- Isa wi'i be : Ndaaree, Mi wadirii golleeji keewdi lobbi e baawde Alla, mi gollidii di fuu e yeeso moodon. Saabe golle oye e majji kaajedon wardude kam e kaaye ? 33- Alahuudiya'en nootii o mbi'i : Min njidaa wardude ma e kaaye saabe golleeji lobbi, de sabu a haali haala bonnooha innde Alla. Aan wo a neddo bolo de ada wadi hoore maa Alla. 34- Isa nootii be wi'i : Ko winndaa ley Dewte dey : Alla innditirii subaabe muudum been wi'i : On fuu on Alla'en. 35- Eden anndi jonkaa en mbaawaa hadude ko winndaa ley Dewte. Alla inndirii be Alla'en kambe o haaldata, 36- sakko miin mo o subii o neli ley adunaaru. Noy wadata ndelle de mbi'on mi bonnii innde Alla saabe mi wi'ii wo mi bii Alla ? 37- Mi tilsintaa koolodon kam si mi wadaay golleeji Baabam. 38- De joonin kaa, baawo on nji'i mi wadii golleeji diin, faysi on koolaaki kam, tilay njabon golleeji diin, paamon faa laabana on, miin e Baabam fuu min gootum, muuyde amin fuu gootum.
39- Katin Alahuudiya'en pilii nanngude o, de o teetii e mabbe, 40- o dilliri katin lettugal maayo Urdun to Yuhanna wadannoo bawtisima, o heddii toon.
41- Tawi yimbe heewbe na ngara to makko na mbi'a : Yuhanna kaa wadaayno golleeji kaayniidi hono di'i, goonga, de ko o halunoo e gorko o fuu wo goonga. 42- Nokku oon yimbe heewbe koolii Isa.
1- Gorko gom na wi'ee Laajaru nyawi sanne. Imo jeyaa ley wuro Baytaniya e leydi Yahuudiya. Toon Mariyama e mawnum debbo bi'eteedo Marta fuu toon njeyaa. 2- Mariyama oon woni debbo jeyido wisude latikoro dow koyde Isa de moytira dum e sukundu muudum. Laajaru kam woni sakiike mabbe gorko, kam nyawi sanne. 3- Wakkati majjum, mawniraabe makko rewbe dido been nuli e Isa mbi'i : Joomam, yiigoo maa mo korsindaa oon sellaa. 4- Nde Isa nanunoo kabaaru oon fuu o wi'i : Ko sakitotoo e nyaw Laajaru fuu wanaa maayde. Sabaabu nyaw kool wo hollinde yimbe fuu baawde Alla e teddeengal muudum. Doon Bii Alla du hebata teddeengal muudum yi'ee.
5- Isa na horsini Marta e minyyum debbo mbi'eteedo Mariyama e minyiibe Laajaru. 6- Ko o nani Laajaru sellaa dum fuu o waawaa dillude sabu imo jeyi heddaade to o tawanoo doon balde didi. 7- Ndeen o wi'i katin taalibbe makko : En njeccoo Yahuudiya. 8- Taalibbe makko been nootii o mbi'i : Moodibbo, booyaay faa'e ko Alahuudiya'en pilii wardude ma e kaaye toon, de aan, ada wi'a a yeccoto toon ? 9- Isa maandini yonki muudum e nyalooma nootii be wi'i : Ngollen joonin sabu Yamde sappo e didi tan woni ley nyalooma, odon anndi si neddo na yaha ley nyalooma fergataako fersataa du sabu na yi'a annoora adunaaru. 10- De si neddo na yaha ley jemma, tilay fergoto sabu annoora Alla walaa e muudum.
11- Isa haalani be haala ka, beydi e dow haala kaan wi'i : Yiigoo men Laajaru wo daani de mi yahan mi findinowa o. 12- Taalibbe makko nootii o mbi'i : Moodibbo, si o daani ni o dada. 13- De maanaa haala Isa wo Laajaru maayii, de taalibbe makko been annditaay, be miilaaynaa hono o daani no ^o^udo daanortoo ni. 14- Ndeen Isa haalani be faa laabi : Laajaru maayii. l5- Nde miilinoomi nafa maayde Laajaru e moodon, mi seyeke ko mi tawaaka toon, sabu joonin kaa on fuu on kooloto mido woodi baawde dow maayde. En njaha to makko joonin kaa. l6- Tomaa noddirteedo funeereejo oon wi'i taalibbe been : En njaha maaydowen e moodibbo meeden .
l7- Nde Isa yottinoo Baytaniya fuu o tawi Laajaru kaa uwiraama gilla balde nay paltiide. l8- Tawi Baytaniya woddaa e Urusaliima ndagu kilooji tati ni. l9- Alahuudiya'en heewbe yuuri Urusaliima ngari to Marta e Mariyama faa be ittana been mettalla berde mubben e dow maayde minyiibe.
20- Nde Marta nanunoo Isa na wara fuu, o yehi o sakkitowi dum. De Mariyama kaa suudu toon heddii na joodii. 21- Marta wi'i Isa : Joomam, si do ngonnodaa minyam oon maayataa, 22- de joonin du mide anndi ko ndookidaa Alla fuu hokkete. 23- Isa wi'i o : Minya iirtoto. 24- Marta nootii o wi'i : Mido anndi o iirtoyto nyalaande sakitotoonde.
25- Isa wi'i o : Miin woni iirtiniiwo, e to am nguurndam yuurata. Neddo fuu kooliido kam faysi maayi, naa wuuru. 26- Neddo buurdo saabe am de hoolii kam maayataa abada. Yallaa ada jabi dum na ? 27- Ayyo Joomam, mide jabi mide hoolii aan woni Almasiihu, Biddo Alla garoowo ley adunaaru.
28- Nde Marta haalunoo haalaaji di fuu yeccii o noddowi minyiiko Mariyama o nyo'ani dum o wi'i dum : Moodibbo meeden do woni, o wi'ii ma ngaraa. 29- Nde Mariyama nanunoo haala ka'a fuu, o gurbitii o hucci to Isa. 30- Ndeen fuu Isa naataay ley wuro tafon. To Marta hawrunoo e makko doon ni o heddii. 31- Nde Alahuudiya'en wondunoobe e Mariyama ley suudu faa mbaaltina o bernde been nji'inoo o gurbitii o wurtii fuu be njokki o be miilii to saabeere minyiiko toon o hucci faa o yaha o woyowa dum. 32- Nde Mariyama yottinoo to Isa woni doon fuu, o yi'i Isa, wakkati gooto o bobbi e koyde Isa o wi'i : Joomam si do ngonnodaa minyam o maayataano. 33- Nde Isa yiinoo imo woya, Alahuudiya'en wardube e makko been du na mboya ndeen, bernde muudum sunii sanne. 34- O yami been toye uwudon o. be nootii be mbi'i : Joomiiamin, war ga faa min kolle. 35- Ndeen Isa du woyi. 36- Alahuudiya'en gom mbi'i : On nj'ii no o yidiri oon. 37- De wobbe mabbe mbi'i : Kanko o woodunoo baawde o wumtini bumdo oon arande ndelle noy wadi de o hadaay Laajaru maayde ?
38- Isa yurmeende mawnde naati dum katin, o yehi to saabeere Laajaru toon. Saabeere ndeen wo loho mawko be uddiri dum e hayre mawnde. 39- Nde Isa yottinoo doon fuu, wi'i be : Ittee uddoode ndeen. Marta mawniiwo maaydo oon wi'i : Joomam, en tawan o luubii sabu o wadii ley saabeere nde'e balde nay. 40- Isa wi'i o : Mi wi'iino ma, nde koolidaa fuu a yi'an teddeengal Alla. 41- Tan hayre ndeen ittaa. Isa tiggitii dow mo ndaara kammu, o heddii mo yetta Alla mo wi'a : Tiyaabu maa Baabam, tiyaabu a jabii nyaagunde am. 42- Mido anndi a jaban kam wakkati fuu. Ko wadi de mido haalda nii, saabe yimbe piilibe kam be'e, faa njaba aan neli kam. 43- Nde o haalunoo haalaaji di fuu, o feekii semmbe o wi'i : Laajaru wurta ga. 44- Maaydo oon wurtii yaasin saabeere nde'e, imo wondi e kasanke makko. Kasanke oon na uddi yeeso makko. Isa wi'i : Kabbitee kasanke o'o e makko de njoppon o yaha. Be ngadi no o wi'i noon.
45- Alahuudiya'en heewbe warnoobe to Mariyama nji'i ko Isa wadi. Feccere mabbe hoolii Isa, 46- feccere wonnde ndeen du yehi to Farisiya'en, be pillanii dum'en ko Isa wadi fuu. 47- Ndeen Farisiya'en e mawbe almaami'en been kawrunduri mawbe mabbe, be mba-
ti be mbi'i hakkunde mabbe : Noy ngadanten gorko o, imo wada golleeji keewdi kaayniidi. 48- Nde njoppuden o mo gollira hono nii fuu, yimbe fuu kooloto o, njokka o du. Ndeen hooreebe Rumaniya'en kaaldan ndewra ngara mbonna miiside meeden mawnde nde'e. Be kalka lenyol meedden ngool fuu.
49- Neddo gom na woni hakkunde mabbe na wi'ee Kayfa.
Hitaande ndeen, oon wonnoo mawdo almaami'en fuu e ley ndewgu mabbe, kam wi'i be : Onon kaa on anndaa faa'e. 50- On paamay faa hannden ko buri nafude on wo neddo gooto maayana yimbe fuu. Noon wadata de lenyol ngool halkataake hantoo fuu. 51- Ko o wonnoo mawdo almaami'en hitaande ndeen duum, dum wadi de o haaliraay haala ka e muuyde makko, de wo Alla watti haala muudum e makko faa o haalana be illa dum waraay, o wi'a be Yeesu maayana lenyol mubben Alahuudiya'en fuu. 52- De wanaa lenyol ngool tan o maayanta. O maayanan du bibbe Alla woddundurbe fuu. O maayanan be, o hawrundira be, o wada be gootum.
53- Nyannde ndeen fuu mawbe Alahuudiya'en kooyi aadi be timmini hakkunde mabbe be mbaran Isa. 54- Dum wadi de Isa seli yaade na yiiltoo hakkunde Alahuudiya'en wakkati fuu. O dilliri ley ndewgu peraangu dakkundurngu e to o wonnoo doon, o yottii ley hibeere gom na wi'ee Efrayim . Toon o heddodii e taalibbe makko balde seeda.
55- Juuldaandu Alahuudiya'en nde kewtunoo ko'e mubben badeke. Gilla juuldaandu mawndu mabbe yottaaki tafon, yimbe heewbe ndewgu nguun njehii Urusaliima faa be keba be lalindonoo ndu, tawee ibe laabi e laawol mab- be. 56- Ndeen Alahuudiya'en been katin keddii na piloo Isa ley yimbe warbe been. Ko be pilotoo Isa duum fuu, kambe ley misiide toon be ngoni, be yamunduri hakkunde mabbe sallaa o waran ley juuldaandu ndu, naa o warataa.
57- Hooreebe almaami'en e Farisiya'en njamirii yimbe fuu be mbi'i neddo fuu jiido to Isa woni faamina be faa be ngara be nannga o.
1- Balde jeegom hadi juuldaandu Alahuudiya'en nde kewtunoo ko'e mubben yottaade.
Isa yehi hibeere Baytaniya. Doon Laajaru joodii. Oon woni gorko mo o iirtini o wartiri e nguurndam. 2- Doon o wadanaa nyaamdu.
Marta woni cenndoowo ndu. Laajaru du tawaama e wondube e Isa nokku hiirtorde doon. 3- Mariyama waddowi latikoro tiiddo sanne gadiraado lefereeji lobbi tan, na badoo fecere liitere. O rufi dow koyde Isa faa o teddina dum, heddii mo moytira e sukundu makko. Suudu nduun fuu uurngol heewi dum. 4- Taalibbo Isa gooto na wi'ee Yahuuda Isikariyota, oon woni jammboytoodo o, oon wi'i : 5- Ko wadi de en coottaay latikoro o'o ujjunaaje teemede tati, kokken talka'en ? 6- O wi'iraay dum saabe o yurmoto talka'en kaa, wo o gujjo. Dum wadi de o haaliri noon, sabu kanko tiigii dannga buudi Isa'en kaan, imo woowi ittude ko wattaa ley toon e dow jammba.
7- De Isa jaabii Yahuuda wi'i : Sel debbo o'o, heese, sabu o resuno latikoro oon faa nyannde nde ngatteteemi ley saabeere. 8- Talka'en kaa, odon mbaawi ndaarde dum'en faa abada, de miin le kanaa ndaaron kam joonin kaa sabu mi heddataako e moodon faa do booyi
9- Alahuudiya'en heewbe nanii Isa Baytaniya woni. Be njehi toon, de wanaa Isa tan yaari be kaa, wo faa be keba be nji'a Laajaru mo Isa iirtini wartiri e nguurndam oon du. 10- Hooreebe Almaami'en kooyi aadi Laajaru waree, 11- sabu Alahuudiya'en heewbe njokkitii laawol mabbe saabe makko, ngarii kooleke Isa.
12- Jaangoore muudum yimbe heewbe ngariino kawrital juuldaandu mawndu nduun, be nanii Isa waran Urusaliima. 13- Be fuu be tayi licce tamborooje be njiila de, be mburtii ley hibeere toon faa be cakkitoo o.
be keddii be peekoo be fuu be mbi'a : Alla woni mawdo, Alla barkin gardoowo e innde Joomiraado : Alla reenu laamiido Isira'iila.
14- Isa hebi arawel pamarel nanngi ngel waddii. Ko binndi kollini duum, sardi majum yotteke jonkaa, sabu winndaama :
Hey
yimbe ndewgu Urusaliima, taa kulee. 15- Inan nii laamiido moodon
na waddii arawel na warda e jam.
16- Nde dum wadatano ndeen, taalibbe makko paamaay tafon maanaa ko o wadata duum.
Ndeen, nde Isa teddinoytee, be miccitoyto ko binndi kaali duum : Inan nii laamiido moodon na waddii arawel, duum winndaama faa hollina ko jeyi hewtaade o. Katin be miccitoyto ko be ngadani o duum wo ko binndi mbi'i. 17- Nde Isa noddunoo Laajaru wurtoo ley saabeere toon faa o wartira dum e nguurndam ndeen yimbe seeda tawaama doon. Tawdanoobe e Isa doon been fuu na pillanoo jamaa ko be nji'i nyannde ndeen. 18- Duum saabii jamaa oon wurtii cakkitii o, sabu be nanii o wadii huunde mawnde haayniinde.
19- Farisiya'en kaaldi hakkunde muudum'en mbi'i :En nji'ii en mbaawaa faa'e, yimbe sowre puddi jokkude o.
20- Yimbe jananbe seeda tawaama e ley yimbe wonbe Urusaliima toon faa njuula juuldaandu mawndu nduun. 21- Be battitii e Filipa, mo Baytaniya ley Galili jeyaa, be mbi'i dum : Hey gorko o, midon njidi yiide Isa minen du. 22- Filipa yehi haaldowi e Andire. Be dido kala be njaadi be kaalani Isa.
23- Isa nootii be wi'i : Joonin kaa, wawtu yotteke nde Mawniiwo Tageefo mawninaa.
24- 25- Mi haalanan on, duum wo goonga : Si wabbere alkama ittaaka wattaa e leydi beydataako du, heddoto wabbere wootere. Hono noon jiddo nguurndam muudum dow adunaaru tan, heddodoto e nguurndam daam tan faa do dam ittaa. Sini wabbere ittaama wattaa ley leydi, wadan gabbe keewde. Hono noon jabudo yoppude nguurndam adunaaru heddoto e nguurndam muudum faa do hebi keddotoodam. 26- Sini o tilsinii mi laatoo mawdo makko, kanaa o yoppa nguurndam adunaaru o jokka kam.
Ndeen, mo laatiimi mawdo muudum wona to ngonmi. Baabam na teddina mo laatiimi mawdo muudum.
27- Joonin kaa mi anndaa fuu ko miilotoomi katin. Dume mbaawmi wiide katin ? Sallaa mi wi'an : Baabam sendam e ko warata e nyalooma oon, naa noy ? De nyalooma oon pay saabanii kam warde. 28- Baabam, teddin innde maada. Nde o haalunoo dum ndeen, sawtu nanaa e kammu na wi'a : Mi teddinii o de mi teddinan o katin. 29- Jamaa tawaado doon oon nani sawtu oon mbi'i : Duum kaa wo riggaango. Wobbe mabbe du mbi'i : Wo maleyka haaldata e makko. 30- De Isa haalani be wi'i : Wanaa miin sawtu oon haalanta faa nanee, de wo onon o haalanta.
31- Joonin kaa wakkati yotteke nde hakkunde yimbe adunaaru hooliibe e be koolaaki been fuu, mono fuu wattee e laawol muudum. Joonin kaa hooreejo adunaaru ndu wo Ibiliisa de riiwete e mayru. 32- De miin le, nde yeptaami e leydi ndi fuu, mi foodan yimbe fuu ngara to am. 33- Hono ko o wi'i o yeptete e leydi duum, dum hollinta maayde nde o jeyi maayrude, o tontee el leggal o yeptee. 34- Jamaa oon fuu nootii o wi'i : Min njanngii ley Dewte laawol amin Almasiihu wuuran faa abada. Ndelle noy mbaawrudaa wiide, Mawniiwo Tageefo na jeyi yepteede ? Moy woni Mawniiwo Tageefo oon le ?
35- Isa maandini hoorem e annoora wi'i be : Faa hannden annoora na woni hakkunde moodon tafon, de booyataa. Njehee e yaadu moodon illa odon ngondi e annoora, taa nimre juha on, sabu jahoowo ley nimre anndaa to fon- ndii. 36- Koolee annoora illa odon ngondi e muudum, faa laatodon yimbe wondube e annoora.
Baawo o haali haala kaan ni'i, Isa dilli suudowii to woddi e mabbe. 37- Faysi o wadi golleeji kaayniidi keewdi hono diin e yeeso mabbe, be koolaaki o. 38- Annabi Esaya haaliino wi'i :
Joomiraado
na famdi sanne jabbe haala maada ?
Na famdi
sanne be Joomiraaado faamini baawde mudum.
Ko
Alahuudiya'en koolaaki duum yottinii haala Annabi Esaya kaan. 39-
Be koolaaki be mbaawaa hoolaade du, sabu ley binndi Esaya diin
Alla du wi'ii :
40-
Miin Alla, mi wumnii hakkillo mabbe, mi uddii anndal mabbe,
taa be nji'a, taa be annda du, taa be mbaylitoroo fara am de
mi ittana be majjaangal ngaal.
41- Ko
Esaya wii'i duum wo sabu yi'iino teddeengal Isa, haala muudum
du o haalatano.
42- De
nde o haalunoo ndeen,fay hooreebe Alahuudiya'en been heewii
hooliibe Isa.Be nanndi e hooliibe, de saabe Farsiya'en,be
kaalaay sabu be kula riiweede ley misiide. 43- Katin du, ko burani
be,be mbela e yimbe jokkube ko adunaaru, de wanaa be mbela e
Alla.
44- Isa haali semmbe wi'i : Kooliido kam fuu, wanaa miin tan hoolii, na hoolii neludo kam du. 45- Jiido kam du, yi'an neludo kam.
46- Miin, mi warii ley adunaaru ndu wo mi annoora, faa neddo fuu kooliido kam wonataa ley nimre. 47- Neddo nanudo haalaaji am de teddintaa di wanaa miin jukkotoo dum, sabu mi warii ley adunaaru faa mi hisina dum, wanaa faa mi jukkoo dum. 48- Neddo fuu caliido kam,jabataa haalaaji am, heban ko jukkotoo dum : Waaju mo mbaajotoomi o'o kam jukkortee dum nyalaande sakitotoonde. 49- Sabu mi haaldaay e baawde am tan,de wo Baabam neludo kam, kam e hoorem yamiri kam ko mbi'ammi e ko mbaajotoomi duum fuu. 50- Katin du mido anndi ko yamiri duum na rima nguurndam dam timmataa. Duum wadi de ko kaaammi fuu na foti, e ko Baabam yamiri kam mi haala.
Isa e taalibbe muudum na kiirtodoo
1- Fadde juuldaandu Alahuudiya'en nde kewtunoo ko'e mubben yottaade, Isa na anndi wakkati muudum oon yotteke faa dilla ley adunaaru ndu yeccoo to Bammum. Faa hannden imo heddii imo yidirii yimbe jokkube o heddotoobe ley adunaaru been no waawi yidireede fuu. Inan nii no o yidirii be.
2- Jemma oon Isa e taalibbe muudum na kiirtodoo. Ndeen tawi Seytaani waylitiino bernde Yahuuda faa oon jammboo Isa. Yahuuda oon woni bii Simon Isikariyota. 3- De Isa kaa, e hoore muudum, ina anndi e Alla yuuri, Alla hokkii o baawde jabde ko warata e makko e salaade ko warata e makko fuu. Ina anndi o yeccoto e Alla du. 4- O ummii to be kiirtoto doon nii, o boortii kaddungal makko dowwal, o heddorii gollirgal tan. O hooyi lefol o habbi e kataare makko. 5- Katin o watti ndiyam e laagaare, o fuddi lootude koyde taalibbe makko o moytiri de lefol ngol o habbunoo e kataare makko ngool. 6- O yottii e Simon Piyer. Kam du wi'i o : Aan Joomiraado, lootata koyde am ? 7- Isa jaabii wi'i : A anndaa fuu maanaa ko ngadammi tafon de a faaman dum ley seeda. 8- Simon Piyer wi'i o abada o lootataa dum koyde. Isa jaabii o wi'i : Sini mi lootaay ma koyde a wanaa neddo am katin. 9- Simon Piyer du wi'i o : Ndelle, Joomiraado, taa lootu koyde am tan, lootu juude am e hoore am du. 10- Isa nootii o wi'i : Lootiido fuu na laabi, kanaa koyde muudum tan keddii saabe yaadu muudum. On fuu odon laabi, de wanaa on fuu bernde mon laabi.
11- Isa le na anndi moy jeyi jammbaade dum du. Duum saabii de wi'i : Wanaa on fuu laabi. 12- Baawo o hantidii lootude koybe mabbe, Isa hooyi kaddungal muudum boornii warti e joonndem. O yami be sallaa be paamii maanaa ko o wadani be duum na ? 13- O beydi haala dow duum o wi'i : Odon noddira kam Moodibbo naa Joomiraado moodon, de odon ngoodi e goonga sabu miin woni duum fuu. 14- baawo miin Joomiraado moodon e moodibbo moodon mi gollanii on golle maccudo, mi lootii on koyde nii, sakko onon, golloobe, lootunduron koyde. 15- Mi hollii on no wayretee jonkaa. Ngadiron ndelle hono no ngadirammi on noon. 16- Mi haalanan on, dum wo goonga : Golloowo waawaa burde mo gollanta oon teddude, nelaado du waawaa burde neludo dum. 17- Odon anndi dum sakko. On ceyoto si on ndewrii noon. 18- De ko kaalammi duum, wanaa haala mon on fuu. Mido anndi be cubiimi de kanaa ko haalaa e binndi duum yottoo : Neddo mo peccidimmi buuruure, kam waylitii jammbii kam. 19- Mi haalanan on joonin fadde majjum yottaade. Nde dum warowi fuu, on kooloto miin woni ko ngonmi pay. 20- Mi haalanan on, dum wo goonga : Neddo jabbitiido mo nelumi jabbiteke kam miin du. Jabbitiido kam du jabbiteke neludo kam.
21- Baawo Isa hantidii waaju oon nii, bernde muudum metti. o wi'i be : Mi haalanan on, dum wo goonga : Gooto moodon yaaran kam to waybe kam. 22- Taalibbe ndaarunduri hakkunde muudum'en de paamaay faa'e moy o wi'i e muudum'en. 23- Taalibbo jidaado Isa sanne oon na dakkii e makko doon. 24- Simon Piyer tamyi o gite o yama Isa moy woni oon. 25- Taalibbo oon na waawi wuuraade faro Isa faa o yama dum. O wi'i : Joomam, moy woni mo mbiidaa e he'amin ? 26- Isa jaabii o wi'i : Mi suuwan heltere buuruure nde'e, de mo kokkumi nde fuu, kam woni mo mbiimi on oon. Wakkati muudum Isa suuwi heltere ndeen hokki Yahuuda, bii Simon Isikariyota. 27- Nde Yahuuda jabunoo heltere ndeen fuu, wakkati oon Ibiliisa naati dum. Isa wi'i o : Haaju mo ngadataa oon, wadu dum law. 28- De wondunoobe e makko doon fuu paamaay ko saabii de o wi'i oon noon. 29- Baawo Yahuuda na tiigii dannga buudi mabbe nii, heewbe e mabbe miilaakinaa Isa wi'aaynaa o yaha o soodonowa dum'en kabaaru juuldaandu nduun, naa o yaha o wadanowa talka'en moyyere. 30- Yahuuda hooyi heltere buuruure ndeen de wakkati muudum fuu Yahuuda wurtowii. Wakkati ndeen wo nimre.
31- Nde Yahuuda wurtinoo ndeen fuu, Isa wi'i : Ayyo, jonkaa teddeengal Mawniiwo Tageefo fuddii faameede, e golleeji makko du teddeengal Alla faamirtee. 32- Baawo golleeji makko teddinan Alla nii, Alla du teddiniran o e golleeji makko. O wadan dum booyataa. 33- Sukaabe am, mi wondan e moodon de wo wakkati seeda tan. On piloyto kam de hannden mi wi'an on ko mbiinoomi Alahuudiya'en : On mbaawaa yaade to njahammi. 34- De mi hollan on gootol dartiingol kesol : Njidunduron hakkunde moodon. Sanaa njidunduron hono no njidirmi on noon. 35- Ndeen yimbe fuu paaman wo on taalibbe am.
36- Simon Piyer yami o wi'i : Joomam, toy njahataa du ? Isa jaabii o wi'i o waawaa jokkude dum to yahata joonin, de nde wadowi seeda fuu, o jokkan dum. 37- Simon Piyer wi'i : Joomam, ko wadi de mi waawaa jokkude ma joonin ? Mi hooyi anniya e bernde am mi jokkete faynde dum saabotoo maayde am. 38- Isa jaabii o wi'i : Ada tennyori a timminii a hokkitan yonki maa saabe am ? Mi haalente, dum wo goonga : Fadde ndontoori jogginde fajiri a wi'owan a wanaa taalibbo am faa hibba kile tati, sakko njokkaa kam.
1- Isa wi'i be : Taa dum wada on miilooji. Koolee Alla, koolodon kam miin du. 2- Na woodi lunde keewde ley suudu Baabam, Mi moyyinanan on lunde deen ley toon. Mi haalantaa on si dum wanaa goonga. 3- Mi yahanmi moyyinanowa on lunde deen, de mi warta mi hooya on mi wadan ngondon e he'am to ngonmi. 4- Odon anndi laawol jahoowol to njahammi toon. 5- Tomaa wi'i : Joomam, min anndaa toy njahataa, noy min ngadata de min annda laawol ngool ? 6- Isa jaabii o wi'i : Miin woni laawol, miin woni to goonga e nguurndam fuu yuurata. Neddo fuu waawaa yaade to Baabiiwo si rewaay to am. 7- Si odon anndi kam on anndii Baabam du. Gilla do odon anndi o, on nji'ii o du. 8- Filipa wi'i o : Joomam, hollu min Baabiiwo. Ndeen heyyii min. 9- Isa jaabii o wi'i : Jiido kam yi'ii Baabiiwo. Mi booyii hakkunde moodon de aan, Filipa, faa hannden a faamaay kam ? Ko wadi de ada wi'a mi holla on Baabiiwo ? 10- A jabataa miin e Baabiiwo fuu wo min gootum ? Waaju mo mbaajotoomi on o'o fuu wanaa e he'am yuurata. Baabiiwo gondudo e he'am, kam wannata kam golleeji muudum di fuu. 11- Koolee kam ko mbiimi miin e Baabiiwo fuu wo min gootum. De si on koolaaki kam nii, na haani koolodon saabe golleeji am diin. 12- Mi haalanan on, dum wo goonga : Kooliido kam fuu wadan ko ngadammi. Mbaawan wadude hono majji faa bura ko ngadumi, sabu mi yahan mi wonda e Baabiiwo, 13- mi wadanan on ko ndookoridon e dow innde am fuu. Ndeen fuu, golleeji Biddo na faamina yimbe teddeengal Baabiiwo. 15- Nde ndookidon kam goddum e dow innde am fuu, mi wadanan on.
15- Si odon njidi kam odon teddina yamirooje am. 16- Mi rookonto on Baabiiwo beyda goddo wonda e moodon na walla on faa abada. Kam woni Poowle Alla holloowo goonga. 17- Yimbe adunaaru mbaawaa jabude o sabu mbaawaa yiide o, mbaawaa anndude o du. De onon kaa, odon anndi o sabu o wondii e berde moodon, o heddoto e moodon du. 18- Mi yoppataa on onon tan, mi wartowan faa to moodon. 19- Nde wadi seeda yimbe adunaaru be njokkaay kam nji'ataa kam katin abada, de onon kaa, on nji'an kam sabu mido wondi e nguurndam keddotoodam, onon du on ngondan e majjam. 20- Nde nyalaande nde ngondoton e majjam ndeen, nde warowi fuu, on paaman miin e Baabam min bernde wootere, miin de moodon du en bernde wootere. 21- Neddo fuu tiigitiido yamirooje am ina teddina di, oon pay woni giddo am. Baabam yidowan njiddo am, miin du mi yidan dum mi hollan dum hoore am.
22- Yahuuda, de wanaa Isikariyota, oon wi'i : Joomam, noy wadata de kollinaa min hoore maa minen tan de wanaa yimbe adunaaru fuu ? 23- Isa nootii o wi'i : Neddo fuu njiddo kam teddinan haalaaji am. Baabam du yidan joomum, miin e Baabam fuu min ngaran to joomum, min ngonda e bernde muudum. 24- Neddo mo yidaa kam teddintaa haalaaji am.
Waaju mo nanudon mido waajoo oon fuu yuuraay e he'am, e Baabam neludo kam o yuuri. 25- Mi haalani on illa mi seedaay e moodon tafon. 26- Poowle Alla laabde de deen, Baabam neldata on e dow innde am faa walla on, kanko tindinta on de miccitodon ko mbaajinoomi on fuu. 27- Mi yoppidan on e jam. Jam am oon kokkammi on. De mi hokkataa on hono no yimbe adunaaru kokkirta noon. Taa dum habba on ko'e, taa dum hulbina on. 28- Jonkaa on nanii ko kaalammi on duum. Mi wi'i on mi yahan de mi wartowa fara moodon. De si odon njidunoo kam faa woodi nii, on ceyoto on paamii mi yahan to Baabam sabu Baabam, kam buri kam manngu. 29- Mi haalanii on dum joonin kaa fadde majjum yottaade, de nde dum warowi fuu on kooloto. 30- Baawo hooreejo adunaaru Ibiliisa na wara faa itta kam yonki nii, mi haaldataa e moodon faa heewa katin. Ibiliisa oon waawaa kam, 31- de kanaa faamina yimbe adunaaru mido yidi Baabiiwo, mi wada ko o yamiri kam. Ummee, ndillen do jonkaa.
1- Miin woni lekki goongalaahi. Baabam woni joomiiki (Tindinoore : Wakkati majjum, tawaangal Alahuudiya'en hadii funcitaado yamee ko wadi). 2- O saltoto licce de njeymi de ndimataa. Licce dimooje deen fuu o moyyina o fonndita de fuu faa de beyda rimde. 3- Waaju mo mbaajotonoomi on oon moyyinii on. 4- De taa kabbitee e he'am, miin du mi habbitataako e moodon. Liccal waawaa rimde si sinndaaki e lekki. Hono noon, si on cinndaaki e he'am tawi en nganaa bernde wootere,
on mbaawaa teddinde waaju am e berde laabde.
5- Miin woni lekki, onon ngoni licce deen. Neddo mo kawtumi bernde, habbitataako e he'am faa abada gollan golleeji laabdi. Sabu si en kawtaay bernde on mbaawaa faa'e. 6- Hono no licce paddirte yaasin faa njoora de kawrunduree faddee ley yiite, hono noon, neddo mo en kawtaay bernde faddirtee yaasin. 7- Si en kawtu bernde, e si on keddodeke e haalaaji am nii, nokku fuu ko kaajedon de ndookidon Alla naa jabu. 8- Nde berde moodon e golleeji moodon na nji'ee na laabi ndeen, yimbe fuu paaman on taalibbe am, paaman du Baabam na tedddi. 9- No Baabam yidiri kam noon, miin du no njidirmi on na foti noon. Taa njoppee njingu am. 10- Nde teddinoydon yamirooje am fuu, on keddoto e njingu am. Hono noon teddinirmi yamirooje Baabam keddidiimi e njingu muudum.
11- Ko mbiimi on duum fuu, sabu mido yidi seyo am heewa e berde moodon, mido yidi seyo moodon taa nyaka faa'e. 12- Inan nii yamiroore
am nde tilsunde jokkee : Njidunduron hono no njidirmi on noon. 13- Njingu fuu burngu manngu wo nde neddo sootti yonki muudum holli na yidi yigiraabe muudum. 14- Nde teddinoydon yamiroore am, on laateke yigiraabe am. 15- Mi noddirtaa on maccube am katin sabu maccudo anndaa ko mawdo muudum wadata. De mi noddiran on yigiraabe am sabu mi faaminii on ko ekitiimi e Baabam fuu. 16- De miin saabanii en laataade yigiraabe. Onon kaa, on cubaaki kam. Miin subii on, mi yamirii
on njahon tawee na yi'ee odon teddina yamirooje am faa abada. Nde ngadon noon fuu, ko ndookidon e dow innde am fuu, Baabiiwo hokkata on dum. 17- Joonin kaa, inan ni haddu yamirooje am deen fuu : Njidunduron, njidon waroobe e moodon.
18- Isa beydi dow haala muudum kaan wi'i : Jokkube ko adunaaru sanne been na mbanyi on, de paamon miin be artii wanyude. 19- Si on naatuno jokkube ko adunaaru, be njidan on sabu kambe njeyannoo on. De mi subeke on, mi ittii on ley yimbe adunaaru been, be njeyaa on katin. Dum wadi de be fuu be mbanyi on. 20- Miccitee ko kaalanmi on : Maccudo waawaa burde mawdo muudum manngu. Nde be tampini kam, miin mawdo mon oon, sakko onon. Nde be teddini waaju am fuu, be teddinan waaju mon du. 21- Onon kooliibe kam, be ngadan on dum fuu sabu be anndaa Alla neludo kam. 22- Si mi waraayno mbaajiimi be dum fuu, be njukkataake hayyeeji mabbe. De joonin kaa walaa no be njoppiree. 23- Neddo fuu banyudo kam wanyii Baabiiwo du. 24- Si mi gollaayno kulle kaayniide mawde yeeso mabbe, be njeyaa jukkeede. De faynde be nji'i golleeji kaayniidi di neddo fuu wadaay abada hono majjum, be mbanyi kam, be mbanyi Baabam du. 25- Noon wadi ko winndanoo arande ley Dewte diina duum, sardi majjum yotteke jonkaa. Sabu binndi mbi'ii : Be mbanyii kam dow bolum.
26- Garoowo faa walla on e ley tampiri mon ndiin, wo Poowle Alla holloowo goonga yuurdo to Baabiiwo. Baabiiwo yoppidi kam e makko faa mi nulda on o'o, kanko haalata haala am. 27- Onon du on kaalan haala am sabu odon anndi haala ka, odon ngondi e he'am gilla e fuddoode.
1- 2- Wakkati gom waran mo kaarminton naadde misiidaaji Alahuudiya'en katin. Be mbara on, be miiloo be ngadii ko waajibii e Alla. Hono ko mbiimi on duum, taa njoppon hoolaade kam. 3- Be ngadan noon sabu be anndaa Baabiiwo,be anndaa kam miin du.4- De mi haalanan on, wakkati warowan mo miccitodon mi haalanii on duum taa njeccorodon gada.
Mi haalanaay on haala ka gilla e fuddoode sabu en ngonduno. 5- De joonin mi yeccoto mi dakkowoo neludo kam. De na haaynii kam ko gooto mon fuu yamataa kam toy njahanmi ? 6- Mi faamii mettalla berde heewi e moodon sabu ko kaalumi mi yeccoto mi dakko neludo kam duum. 7- De joonin kaa mi haalanan on goonga : Ko buri nafude on wo mi yahana on sabu si mi yahanaay on, garoowo faa walla on oon warataa e moodon. De si mi yehii mi neldan on o. 8- Nde o warowi fuu, o funcitan yimbe adunaaru saabe hayyeeji muudum'en e saabe ko be anndaayno dartiido. Katin du o funcitan be saabe ko be killaaka sariya Alla. 9- Hono ko be funcitetee saabe hayyeeji mabbe duum, be koolaaki kam. 10- Ko be anndaayno dartiido duum du funcitan be sabu mi yahan to Baabiiwo de be nji'ataa kam, be mbaawataa anndude kam katin. 11- Hono ko be killaaka sariya Alla, be miileke sariya walaa, tawe Seytaani woni kaananke mabbe, kam kaa sardaama.
12- Na heewi haalaaji am di kaandon nande nafooji on, de on ngalaa semmbe nande di joonin. 13- Poowle Alla kollooje goonga deen, nde ngari ley adunaaru fuu, hollan on haddu goonga fuu. Ko o haalata duum fuu wanaa e muuyde makko tan, de o haalanan on ko o nani, o anndinan on ko warata e dow laamu Alla fuu. 14- Kanko haalanta on ko teddinta kam sabu o jaban haalaaji yuurdi e he'am fuu de o haalanan on di. 15- Nokku fuu ko teddinta Baabiiwo duum teddinta kam. Duum wadi de mido waawi wiide Poowle Alla na waawi haalande on ko yuuri e he'am sabu ko o nani to am, to Baabiiwo yuurata.
16- Nde wadi seeda fuu on nji'ataa kam, nde wadi seeda katin on nji'an kam. 17- Taalibbe Isa been, wobbe mabbe keddii na yamundura na mbi'a ko dum wari wiide mo wi'a en : Nde wadi seeda en nji'ataa o, nde wadi seeda katin en nji'an o. Be mbi'i hakkunde mabbe : O wi'ii katin en nji'ataa o sabu o yahan dakkol Baabiiwo. 18- Dum fuu dume wari wiide : Nde wadi seeda on nji'ataa kam, nde wadi seeda on nji'an kam katin ? Kanko haali noon de min paamaay ko o muuyi wiide. 19- Isa faami ibe njidi yamtindaade dum, o tindini be o wi'i : Mi haalanii on : Nde wadi seeda fuu on nji'ataa kam, nde wadi seeda katin on nji'an kam. Duum mbi'aton hakkunde moodon on paamaay na ? 20- Goonga kaalananmi on. On mbullan faa daade moodon nanee do, ndeen jokkube ko adunaaru be ceyoo. Onon du berde moodon metta, de mettalla berde mon oon waylitoyto wela. 21- Hono no debereedu badiido rimude berndem na metti sabu na anndi tampirim warowan. De nde hebi rimude fuu, yeggitan tampiri ndi tampunoo ndiin, seyoto sabu waddii cukalel ley adunaaru. 22- Hono noon onon du on cunoto joonin, de on ceyoto nde ngartoymi e moodon njiiden. Gooto fuu waawaa mettinde berde mon katin.
23- Nde wakkati oon wari fuu, on yamataa kam faa'e katin. Mi haalanan on, dum wo goonga : Ko ndookotodon e dow innde am fuu Baabiiwo hokkan on. 24- Faa hannden on ndookaaki faa'e e dow innde am. Ndookee o, o wadanan on, de seyoore moodon heewan sanne.
25- Mi haaldii e moodon dum fuu de mi laabinanaay on. Wakkati warowan katin nde mi banndantaa on katin. Mi haalanan on faa laaba haala Baabiiwo. 26- 27- Baabiiwo kaa, e hoorem na yidi on sanne sabu odon njidi kam, odon njabi e dakkol Alla yuurmi. Ndeen mi nyaagantaako on e Baabiiwo katin sabu, nde wakkati oon wari fuu, onon e ko'e mon, odon mbaawi rookaade Baabiiwo e dow innde am. Dum wadi de mi wi'aay on mi nyaagonto on e Baabiiwo. 28- Odon mbaawi rokaade Baabiiwo e dow innde am sabu mi yuuri e dakkol Baabiiwo mi warii ley adunaaru, de joonin mi dillan e ley adunaaru ndu mi hoota dakkol Baabiiwo.
29- Taalibbe makko mbi'i o : Ayyo, joonin kaa a haalanii min faa laabi, a banndanaay min katin. 30- Min paamii joonin kaa yamde ma nafataa sabu ada anndi ko woni ley anniya neddo gilla haalaay. duum wadi midon koolii to Alla yuurdaa.
31- Isa nootii be wi'i : On mbi'ii on miileke on kooleke joonin na ? 32- De wakkati warowan on fuu on tampinete faa ceedon, neddo moodon fuu naatowa ley suudu muudum, njoppon kam miin tan. Mi haalinii on wakkati oon badeke joonin kaa. De faysi njoppudon kam mi heddataako miin tan sabu Baabiiwo wondi e he'am. 33- Mi haalanii on dum fuu faa ngondon e he'am kebon jam. On tampowan ley adunaaru, de nde tampiri ndi'i wari fuu, tinnodon berde moodon njoora sabu mi hawii Seytaani e yimbe muudum fuu.
1- Nde o haalunoo dum fuu, Isa tiggitii kammu, nyaaganii taalibbe muudum wi'i : Baaba, inan nii kam, wakkati mo kokkudaa kam oon warii. Anndin yimbe fuu biya na teddi faa biya du heba faamina yimbe ada teddi nde waretee. 2- A hokkii o baawde dow neddo fuu a subeke yimbe been, a hokkii o faa o hokka be nguurndam keddotoodam. 3- Nguurndam daam woni gondal maada, aan Alla gooto, e gondal Isa Almasiihu nelaado maa. Duum woni nguurndam daam. 4- Mi anndinii yimbe adunaaru fuu ada teddi. Mi hantii ko mbiidaa mi wada duum fuu. 5- De joonin kaa, Baaba, teddinam yeeso maa, hokkitam teddeengal am ngal ngondunoomi e maada gilla adunaaru tagaaka. 6- Sabu yimbe wonube ley adunaaru be teetudaa kokkudaa kam been, mi anndinii be ma. Subaabe been, aan jeyinoo be, aan hokkikam be, de be teddinii haala maa, 7- Be paami joonin kaa ko kokkudaa kam fuu to maada yuuri. 8- Mi nandinii be haalaaji maada di nandindaa kam. be nani dii, be njabii. Be tennyorii e maada yuurumi, be kooleke aan neli kam.
9- Mi nyaagonto be kambe tan. Mi nyaagantaako yimbe adunaaru fuu, be kokkudaa kam be'e tan nyaagontoomi sabu aan jeyi be. l0- be njeymi fuu, aan jeyi, be njeydaa fuu, miin jeyi. Hono no be ngoyri noon teddinii kam. 11- Joonin kaa mi wonataa ley adunaaru katin, de kambe kaa, toon be ngoni. Miin le mi yoppii be mi yahan to maa, aan Baabam Laabdo, taa yoppu be kokkudaa kam been mboddowoo faa be keba ndeenaa be e baawde maada. Ndeenaa be faa kambe e meeden fuu laaddoden gootum. 12- Nde ngondunoomi e mabbe ndeen, mi reenirii be e baawde maa, mi reenii be kokkudaa kam been, gooto mabbe fuu seedaay e maada kanaa jeyinoodo seedude e maada oon tan. Ndeen ko winndanoo ley Dewte e dow haala jammbotoodo oon, sardi majjum yotteke. 13- De joonin kaa mi wartii to maada, mi haalan haalaaji diin gilla mi dillaay adunaaru faa be fuu be keba seyo am, seyo ngo faa'e nyakataa e muudum. 14- Mi haalanii be haalaaji maada, de jokkube ko adunaaru mbanyii be sabu golleeji mabbe nganaa gootum. Miin du golleeji am e mabbe nganaa gootum. 15- Mi nyaagaraaki ma faa ittaa be ley adunaaru, wo mi nyaage faa ndeenaa be e Seytaani gadoowo ko boni. 16- Jokkube ko adunaaru njeyaa be. Hono no mi jeyiraaka e yimbe adunaaru. 17- haala maada wo goonga. Wadu faa be njaba haala maada goongaaha ka, be njoppa belde adunaaru, kettinaabe gere o'o to, be ngolla golleeji maada. 18- Mi nelii be ley adunaaru, hono noon nulirdaa kam ley adunaaru. 19- Miin du, mi hokkitii hoore am saabe mabbe faa kambe du be njoppa belde adunaaru be kokkita ko'e mabbe e maada sabu be paamii to goonga woni. 20- Mi nyaaganaaki be kambe tan, wobbe kooloto kam saabe haalaaji mabbe, 21- Been du mi nyaagonto be, faa be laatoo gootum, hono noon, Baabam, aan wo a miin, miin woni aan. Mi nyaagoto faa be fuu be kooloo en be kawrita be laatoo gootum, ndelle ndeen yimbe adunaaru nji'i dum fuu, kamben du be kooloto aan neli kam. 22- Miin mi hokkii be teddeengal am ngal kokkudaa kam, ngal be laatoo gootum hono no laatoriden gootum. 23- Miin, mi kambe, aan wo a miin. Mi hokkii be teddeengal ngal faa be fuu be laatoo gootum.
24- Baabam, aan hokki kam be. Mido yidi be ngonda e he'am to njahanmi fuu faa be keba be nji'a teddeengal am ngal kokkudaa kam. A hokkii kam ngal sabu a yidii kam gilla adunaaru tagaaka. 25- Baabam mo jammba walaa, yimbe adunaaru be njabaay ma, miin kaa mido jabi ma, bee du njabii aan neli kam. 26- Mi anndinii be moy woni Alla, de mi selataa anndinde be, faa be keba njingu manngu ngu njidudaa kam, faa miin e hoore am mi wona ley berde mabbe.
1- Nde Isa timminnoo du'aawu muudum fuu, kam e taalibbe muudum mburtidii joonin kaa njehi faa peyyita gooruwol Sedron ketta lettugal maggol. Nokku oon wo ngesa ledde keewde. O naaddi e taalibbe makko ley ngesa nga. 2- Taalibbo gooto bi'eteedo Yahuuda oon wo jammbotoodo Isa. Imo anndi nokkuure ndeen sabu arande taalibbe e Isa fuu ibe mboownoo hawritinde nokku oon. 3- Mawbe almaami'en e Farisiya'en kamben kaaldi e Yahuuda faa holla yimbe mabbe e sordasiibe to Isa woni. Yahuuda yehi wardi e sordasiibe, e nulaabe almaami'en e Farisiya'en. Be kawriti be tiigii kabitirde mabbe e fittillaaji fuu faa be ngara to Isa. 4- Nde be njottinoo to makko fuu, Isa, faysi anndunoo huunde fuu ko jeyi hewtaade dum, o battiteke be, o lamndii be : Moy pilotodon ? 5- Be nootii o be mbi'i : Isa neddo Nasaratu min pilotoo. Nde be mbiinoo noon fuu, Isa nootii be wi'i be : Miin woni kanko.
Yahuuda jammbotoodo e mabbe tawaa. 6- Nde Isa wi'inoo wo miin woni kanko fuu, be njettitorii gada gada, be bobbii e leydi. 7- Ndeen Isa w'i be katin : Moy pilotodon ? Be mbi'i : Isa neddo Nasaratu min pilotoo. 8- Isa wi'i be : Mi haalanii on, miin woni kanko. Ndeen Isa wi'i be katin : Si miin kaajedon fuu njoppee ndelle yimbe am be'e kaa. 9- Ko o wi'i duum faa o reena be faa han. Ko o reeniri be noon duum yottini haala makko ka o haaluno arande de wi'i : Laamdo, mi reenii yimbe be kokkudaa kam fuu, faa'e gooto lallaay.
l0- Simon Piyer na wondunoo e kaafaahi muudum doon, soorti kaafaahi kiin e hulgo muudum, soppi gollonoowo mawdo almaami'en oon, o tayi dum nowru gere nyaamo. Innde coppaado oon Marka o wi'etee. 11- Ndeen Isa wi'i Piyer : Yeccin kaafaahi maa ki e hulgo muudum. De wi'i katin : Na haani mi wada ko Baabam yamiri kam.
12- Nde Piyer yeccinnoo kafaahi muudum fuu, sordasiibe e mawdo mubben e nulaabe mawbe Alahuudiya'en fuu be njehi, be nanngi Isa be kabbi dum. 13- Be njaari dum to Anna tafon. Anna oon wo esoo Kayiibu. Kayiibu oon wo mawdo almaami'en hitaande ndeen. 14- Kam tindinnoo mawbe Alahuudiya'en gilla arande o wi'i : Ko buri nafude on wo neddo gooto maayana yimbe fuu
15- Simon Piyer e taalibbo Isa gooto na wonno doon, kamben du njokkii Isa. Tawi mawbe almaami'en na anndi taalibbo oon, dum wadi de o hebi naaddude e Isa ley galle mawdo almaami'en oon. Piyer kaa darii yaasin dakkol gampuwal. 16- Mo mawdo almaami'en anndi oon wurtii wari e dammbugal doon haaldi e debbo doomoowo dammbugal o wi'i : Accu Simon Piyer naata. 17- Nde Piyer warnoo faa faltoo fuu, ndaaroowo dammbugal oon wi'i : Hey, aan du wo a taalibbo ngora nga na ? O nootii o wi'i o wanaa.
18- Jaangol wadii jemma oon. Gollonoobe mawdo almaami'en e nulaabe Farisiya'en fuu ibe yuuloo e dudal. Simon Piyer du na yuuldoo e mabbe.
19- Nde dum wannoo fuu mawdo almaami'en oon yami Isa kabaaru taalibbe muudum e kabaaru ko waajotoo. 20- Isa nootii o wi'i : Miin kaa mi suudaaki nde mbaajotonoomi. Mi waranno mido waajoo ley miisiidaaji Alahuudiya'en, e ley misiide mawnde ndeen, to mawbe Alahuudiya'en kawritata. Miin kaa abada mi haalaay e cuncunka. Mi haalii e yeeso yimbe fuu. 21- Ko wadi de ada yamira kam nii ? Yamoy yimbe nanube ko kaalunoomi. Inan nii be, ibe anndi ko kaalunoomi fuu. 22- Nde o haalunoo haalaaji di'i fuu, nulaado Farisiya'en gooto na tawaa doon, feenyi Isa de wi'i : Ni nootortodaa mawdo almaami'en na ? 23- Isa nootii o wi'i : Hollam ko boni ko kaalumi duum. Soni mi haali ko woodi ko wadi de ada fiya kam ? 24- Ndeen Anna wi'i o yaaree to Kayiibu mawdo almaami'en oon, tawee imo habbaa.
25- Ley galle toon, Simon Piyer heddiino na yuuloo wakkatim. Oon o yamaa : Aan du wo a taalibbo ngora nga na ? O nootii o wi'i o wanaa. 26- Gollonoowo mawdo almaami'en imo jeyidaa e mo Simon Piyer tayunoo nowru oon, de oon wi'i : Wanaa mi yi'ii ma e ley ngesa ledde mawbe gonde gere o'oto, aan e makko na ? 27- Joonin katin Piyer jabaay wi'i wanaa. Wakkati muudum fuu ndontoori joggini.
28- Fajiri kecco be itti Isa to Kayiibu be njaari dum ley suudu mawndu koferneere mabbe. Nde be njaarnoo o ley galle suudu nduun fuu, kambe e ko'e mabbe be naataay. Be keddii yaasin sabu so be naatii ley toon fuu be tuunan e diina mabbe be kebataa laawol nyaamde nyaamdu juuldaandu mawndu nde Alahuudiya'en kewtunoo ko'e mubben. 29- Saabe ko yimbe been njabaay naadde ley galle toon duum, dum saabanii koferneere bi'eteedo Pilaatu oon, wo kam wurtii, haaldi e mabbe wi'i : Dume funcitudon gorko o'o de ngaddudon o ? 30- Be nootii Pilaatu be mbi'i dum : Si wanaa gorko o wo bondo nanngataake faa waddee to maa. 31- Gada majjum Pilaatu wi'i be nannga o joonin kaa, be njeccodoo to mabbe, be cardowooemakko sariya mabbe. Alahuudiya'en nootii o mbi'i dum gasataa sabu laamiibe leydi hokkaay be laawol warde goddo. 32- Ko Isa haalunoo dow maayde muudum fuu, sardi muudum yotteke joonin kaa, hollinii maayde no o jeyi maayrude.
33- Pilaatu yeccii naati ley suudu muudum toon, noddi Isa jalnorii dum wi'i : Aan woni amiiru Alahuudiya'en na ? 34- Isa nootii o wi'i : Sallaa haala ka e hemaa yuuri naa neddo feereejo haalani maa ? 35- Pilaatu nootii o wi'i : Miin wo mi Alahuudiya faa mi faama dum na ? O wi'i : Yimbe maa e mawbe almaami'en kambe nanngi maa ngaddi to am faa mi saroo hakkunde moodon. Dume ngaddaa du ? 36- Isa nootii o wi'i : Miin le, laamu am yimbe adunaaru njeyaa dum. Sini yimbe adunaaru njeyinoo laamu am, wondiibe am kabanno e mabbe kada be nanngude kam faa be njaara kam to hooreebe Alahuudiya'en. De laamu am yuuraay e ley adunaaru ndu. 37- Ndeen Pilaatu wi'i o : Ndelle aan wo a amiiru ? Isa jaabii o wi'i : Aan nayrumi. Goonga wo mi amiiru, duum wadi de ndimaami ngarmi ley adunaaru faa mi haalana on kabaaru goonga yuurudo to Alla. Neddo fuu jabudo goonga o'o teddinan haala am. 38- Koferneere Pilaatu wi'i : Dume woni goonga du ?
Nde o yottinnoo haala kaan fuu o wurtii katin o yehi yeeso Alahuudiya'en o haalani be : Miin le mi yi'aay fuu ko gorko o wadi ko boni de heyyanee. 39- Joonin kaa hitaande fuu, nde juuldaandu mawndu wari fuu, na woowi kasuujo gooto wurtinee yoppee. Mi wurtinanan on amiiru Alahuudiya'en na ? 40- Heddii be peekoo be mbi'a : wanaa kanko, wo Barabbaa min kaajaa yoppee. Tawi Barabbaa o'o le wo ittoowo yonkiiji.
19 1- Wakkati oon fuu Pilaatu yamiri sordasiibe ngara nannga Isa be piya dum dorwi faa lamma. 2- Sordasiibe been du piilundurii loosi gi'e be boorni di e hoore Isa be ngadi hono no amiiru meellortoo ni, de be boorni o alahubbaare siinde hono alahubbaare amiiru mabbe. Joonin kaa be battitii o, 3- heddii be mbi'a o : Foofoo amiiru Alahuudiya'en. Heddii be peenya o. 4- Pilaatu wurtii katin wi'i yimbe wonube do : Ndaa, mi wurtinanan on o yaasin galle faa paamon miin kaa mi tawaay huunde fuu ko boni ko woni e gorko o'o. 5- Isa wurtii ina meellii meellol gi'e muudum ina boornii alauubbaare siinde. Ndeen Pilaatu wi'i be : Inan gorko o'o. 6- Mawbe almaami'en e nulaabe Farisiya'en nde njiino o fuu heddii be peekoo : Tontee mo e leggal, tontee mo e leggal. Ndeen Pilaatu nootii be wi'i be ngara be nannga o, kambe e ko'e mabbe, be tonta o e leggal, sabu kam e hoorem kaa tawaay huunde fuu ko boni ko woni e gorko o'o. 7- Ndeen Alahuudiya'en nootii mbi'i kamben kaa, e laawol mubben, imo jeyi wareede sabu o wadaaynaa hoore makko bii Alla. 8- Nde Pilaatu nanunoo haala ka'a fuu, kulal muudum beydii. 9- O yeccitii katin ley suudu makko mawndu nduun, o yami Isa toy njeyedaa du ? De Isa kaa nootaaki faa'e. l0- Pilaatu wi'i miin koferneere o a jabataa haaldude e he'am na ? A anndaa mide waawi wadude de njoppedaa, mide waawi wadude de tontedaa e leggal na ? 11- Isa nootii o wi'i : A walaa baawde e he'am si wanaa to Alla yuuri. Ko baawde e anndal fuu e Alla yuurata duum saabi neddo jaarudo kam to maa, kam buri maa hayyeeji mawdi. 12- Gilla ndeen Pilaatu na filoo sanne yoppude o. De Alahuudiya'en heddii na peekoo na mbi'a : Nde njoppudaa Isa fuu a wanaa gondudo e Sesar mawdo laamu, sabu si neddo warii wi'ii hoorem wo amiiru leydi ndi'i fuu, kam wo ganyo Sesar. 13- Nde Pilaatu nanunoo haalaaji diin fuu, wurtini Isa yaasin, o joodii dow joodorgal carotoodo, doon wo nokkuure sariya wi'eteende kaaye cehaade, e haala Alahuudiya'en Gabbata nde wi'etee. 14- Nyannde ndeen wo nyannde Alahuudiya'enlalindantonoo Juuldaandu mubben mawndu. Wakkati muudum wo hakkunnaange. Pilaatu haaldi e Alahuudiya'en wi'i : Inan amiiru moodon. 15- Be nootii heddii be peekoo : O waree o waree, o tontee e leggal. Pilaatu wi'i be : Kanaa mi tonta amiiru moodon na ? Mawbe almaami'en mbi'i kamben kaa ngalaa amiiru sanaa Sesar mawdo laamu. 16- Ndeen o hokkitibe Isa be tonta dum e leggal.
Sordasiibe nanngi Isa be njaadi e muudum. 17- Isa e hoorem hooyi leggal muudum wakkii hucci nokkuure to jeyi tonteede toon. Nokkuure ndeen wi'ataakenaa nganngu, e haala Alahuudiya'en Golgota nde wi'etee. 18- Doon sordaasiibe been tonti Isa e leggal, kanko e yimbe dido wobbe. O'o hetti o gere nyaamo, o'o hetti o gere nano, kanko woni hakkunde. 19- Ndeen Pilaatu wi'i derewol winndee takkee e leggal to Isa tontaa doon, be mbinndi be takki. Be mbinndi : Isa neddo Nasaratu amiiru Alahuudiya'en. 20- To be tonti o doon wo dakkol wuro. Yimbe heewbe ina paltoo doon na mbaawi janngude binndi diin sabu winndaamaa e binndi haalaaje tati. Nde'e wo alahuudiyankoore nde'e wo romankoore, nde'e wo gerankoore. 21- Ndeen mawbe almaami'en e Alahuudiya'en ngari to Pilaatu mbi'i ko wadi de o winndi : Amiiru Alahuudiya'en, ko wadi de o winndaay : Gorko oon wi'aaynaa kam woni amiiru Alahuudiya'en ? 22- Pilaatu nootii hono ko winndi dum kaa heddeke. Kam winndi. 23- Sordasiibe nde tontunoo Isa fuu, be kooyi kaddule muudum be pecci pecce nay, mono mabbe fuu hooyi feccere. Imo wondi e saaya mawka ka nyo'aaka gilla dow makka faa ley. 24- Be mbii taa be ceeka ka'a kaa. Be mbi'i mo tiindem hokki dum fuu kam jeyi. Tawi Dewte diina mbi'iino arande : Be cenndii kaddule makko hakkunde mabbe. Be mbii mo tiindem hokki dum, kam hebata. Sardi majjum yotteke jonkaa. Duum woni ko sordasiibe ngadi.
25- Dakkol leggal to Isa tontanoo doon, innam e minyoo innam debbo ina ndardunoo doon e Mari dee Koplaase e Mari katin yuuroowo Magadala, doon be fuu be ndardi. 26- Isa yi'i innam e talibbo muudum mo yidi na ndarodii fuu, o wi'i inniiko : inan biya. 27- O wi'i taalibbo makko oon du : Inan inna maa. Gilla ndeen taalibbo makko oon tiigii inniiko oon jonkaa.
28- Ndeen Isa na anndi joonin kaa walaa fuu ko heddii katin. O wi'i o domdii. Ko o wi'i o domdii duum yottini ko Dewtere mabbe wiinoo. 29- Dakkol doon loondel pamarel ina wondunoo doon e njaram lammudam. Be kooyi sawru juutundu be kabbi hoore mayru lefereeji be tummbidi e ndiyam daam be itti be meedini o 30- Nde Isa meedunoo dam fuu o wi'i walaa fuu ko heddii katin. O libi hoore makko o hokkiti yonki makko o maayi.
31- Nyannde ndeen wo nyannde mawnde sanne nde Alahuudiya'en lalindantonoo juldaandu mawndu mubben. Hiiri oon juldaandu warata. Duum wadi de be njidaano banli tontaabe e ledde diin keddoo e nkku oon. Ndeen Alahuudiya'en njehiii ndookowii Pilaatu yamira koyde tontaabe been kelee, sabu nde koyde mabbe kelaa fuu, tontaabe been maayan law banli mabbe ittee doon illa juuldaandu finaay. 32- Sordasiibe njehi keli koyde yimbe dido be Isa tontidanoo been. 33- De nde be njottinoo e Isa, be tawi kam kaa maayii. Be kelaay dum koyde. 34- Ndeen sordaasi gooto na wondunoo doon e labbo muudum yuwi o wuttudu. Wakkati muudum fuu yiiyam e ndiyam fuu wurtii.
35- Neddo mo duum fuu wadi e yeeso muudum oon seedii dum. O yi'ii dum fuu. Imo tennyorii seedaango makko e majjum wo goonga. O haala goonga imo anndi goonga o haali faa yimbe janngube dewtere nde'e du ngoondina wo goonga.
36- Dewte Alahuudiya'en diina mbi'iino : yi'al makko fuu helataake. 37- Nde wiinoo katin : be nji'an mo be yuwi oon. Sardi majjum fuu yotteke jonkaa.
38- Nde dum timmunoo fuu, Yusufu neddo jeyaado Arimmante, oon wo taalibbo Isa e cuncunka e kulal makko Alahuudiya'en. O wari o rookii pilaatu faa o itta banndu Isa e nokku oon. Pilaatu jabi. O yeccii to Isa toon o ittowi banndu muudum nduu. 39- Nikodemu, kam woni jahunoodo to Isa arande e ley jemma, wardi e latikoro haakolooji didi. Ko'o miri wi'etee, ko'o alowi wi'etee. O waddi latikoro oon ndagu liitereeji capande joy. 40- Be kooyi banndu Isa nduun be piili dum e leppi bujanoodi latikoro oon. Be piilidi e muudum faa yottii. Dum Alahuudiya'en mboowi wadande e maaydo mubben fuu. 41- To Isa tontanoo e leggal doon, ledde mawde ina doon, e ley ledde mawde deen saabeere heyre ina doon na foti e suudu manngu. Faa'e gooto wattaaka ley saabeere doon. 42- Be kooyi banndu Isa nduun be ngattowi e ley saabeere ndeen. Nyannde ndeen Alahuudiya'en lalindonontoo ndeen battiteke sanne, duum saabanii be yaawde faa be ngatta banndu Isa ley saabeere ndeen. Tawi saabeere ndeen na battitii e ledde mawde to Isa tontanoo doon.
1- Wakkati oon wo alal, nyalooma arandeejo jeddiire Alahuudiya'en. Gilla beetee, Mari Magadala yehi to saabeere toon, tawi hayre mawnde uddiranoonde ndeen ittaama. 2- O doggi o yehi o haalnowi Simon Piyer, kam e taalibbo mo Isa yidi oon. O wi'i been : Joomiiwo men ittaama e saabeere ndeen de mi anndaa to o wattaa kaa. 3- Piyer e taalibbo oyo oon ndoggi kucci to saabeere toon. 4- Be dido kala be ndoggida yaade. Taalibbo oyo oon arditii Piyer, imo arti dum e saabeere toon. 5- O darii o turii o ndaari ley toon o yi'i leppi diin na mbaalii toon de o naataay kaa. 6- Simon Piyer kam du na dogga warde faa yottii doon, naati e ley saabeere ndeen, yi'i leppi diin ina mbaalii to banndu makko waalinoo doon. 7- Muundanoongol e hoore makko ngol, no muundiranoo noon heddorii e to hoore makko waalinoo doon e feerem. 8- Ndeen taalibbo artunoodo Piyer oon, kam du naati ley saabeere. Nde o yi'unoo no dum woyri ndeen, o jabi goondinde oon joonin kaa. 9- sabu nde kulleeji di fuu njottinoo taalibbe been kaa, annditaayno ko binndi diin mbi'unoo, Sallaa Isa na maaya faa iirtoo hakkunde maaybe. l0- Taalibbe dido been kaa kooti.
11- Wakkati oon Mari ina wonnoo yaasin dakkol saabeere toon ina woya. O turii faa o yuurnoo o ndaara ley saabeere toon, 12- o yi'i maleyka'en dido na boornii ko rawni fer ina njoodii to banndu Isa waalinoo doon. O'o na joodii to hoore makko wonnoo doon, o'o na joodii to koyde makko ngonnoo doon. 13- Be mbi'i : Ko wadi debbo de ada woya ? O nootii be o wi'i : Joomam ittaa do de mi anndaa fuu to yaaraa. 14- 15- Nde o haaldunoo noon fuu o yeeyii, o yi'i Isa na darii. De Isa wi'i o : Ko wadi debbo de ada woya, moy pilotodaa ? Kanko o anndaa sallaa Isa haaldata e makko. O sikki wo golloowo ngesa ledde oon haaldata e makko. O wi'i : Hey gorko, so aan itti Joomam o'o nii kaalanaa kam to ngattudaa o faa mi yaha mi hooyowa o. 16- Isa wi'i : Mari. Mari yeeyii wi'i e haalaare Alahuudiya'en : Rabbuni. Dum wi'ataakenaa e haalaare meeden moodibbo. 17- Isa wi'i o : Dara, taa meemam sabu mi teddinaaka tafon. Kanaa mi yaha to Baabam de mi teddinee. Yah to sakiraabe am, kaalanaa dum'en mi yee^an mi yaha to Baabam, wo Baaba moodon du, to Alla am, wo Alla moodon du. 18- Ndeen Mari Magadala wari haalani taalibbe been o yi'ii Joomiiwo. Kam haalani o haalaaji di'i.
19- Nyannde alal ndeen, alaasara majjum, Taalibbe Isa been e ley suudu ngonnoo ina cokitii e kulal mubben mawbe Alahuudiya'en. Nde be ngonnoo ley suudu toon fuu, wakkati gooto Isa bangi e mabbe de wi'i : Cellal wondu e moodon. 20- Nde o wiinoo noon fuu o holli be juude makko e wuttudu makko. Ndeen taalibbe kuyii njiitii Jomiiwo mubben. 21- Isa wi'i be katin : Cellal wondu e moodon. Hono no Baabam neldi kam ley adunaaru, miin du mi nelan on ley adunaaru. 22- Nde o wi'inoo noon fuu, o fuufi dow mabbe o wi'i : Njabee Poowle Laamdo. 23- Ndeen o wi'i be : be njaafanidon hayyeeji mubben fuu, keban yaafeede, be on njaafanaaki du, hayyeeji mubben keddoto e mubben.
24- E taalibbe Isa sappo e dido been, gooto mabbe ina wi'ee Tomaa de mo noddiree Funeereejo. Nde Isa bangunoo e taalibbe muudum been ndeen, Tomaa tawaaka doon. 25- Nde o wartunoo fuu, taalibbe been mbi'i hannden be nji'ii Jom mubben bangi. O nootii o wi'i kanko kaa o jabataa so wanaa nde o yi'i to maande pontiije deen do njuwanoo e juude makko deen, de o watti honndu makko to maande nde wonnoo, de o watti junngo makko to labbo ngo yuwanoo e wuttudu makko doon. So wanaa noon fuu o jabataa.
26- Nyannde fuddoode jeddiire wonnde, katin taalibbe Isa been kawriti ley suudu to Isa tawunoo be arande toon, tawi be cokitinoo ley toon. Tomaa oon ina tawaa e mabbe nyannde ndeen doon. Wakkati gooto Isa funti e mabbe wi'i be : Cellal wondu e moodon. 27- O wi'i katin : Tomaa hey, battin honndu maada, ndaaru juude am de'e, waddu junngo maa ngo, wattu ngo e wuttudu am ndu'u, de celaa sikkitirde de koolodaa. 28- Tomaa nootii wi'i kanko woni joomiraado muudum kanko woni Laamdo muudum. 29- Isa wi'i o : Sabu a yi'ii kam naa dum wadi de koolodaa ? Alla barka be nji'aay kam de njabi kam.
30- Isa golli kulle kaayniide keewde deen yeeso taalibbe muudum, de kulle kaayniide godde majje keewde mbinndaaka ley dewtere nde'e. 31- Hono ko winndaa ley dewtere nde'e, faa njabon Isa kam woni Almasiihu. Jabudo duum fuu keban nguurndam keddotoodam e dow innde makko.
1- Baawo majjum Isa bangunoo e taalibbe muudum katin e juurdude maayo Tiberiya, Ina nii no Isa wadi de bangi e taalibbe muudum katin. 2- Simon Piyer, e Tomaa noddirteedo Funereejo, e Natanayel yuuroowo Kana leydi Galili, e bibbe Sebede, e taalibbe Isa dido katin ina tawaa doon. 3- Ndeen Simon Piyer wi'i kam kaa yahan nanngowa liyyi. Taalibbe been mbi'i kamben du njokkan o njaada e makko. Be naatowi laana mabbe, be mbaali be pada fiil mabbe de be kebaay faa'e liingu ngootu faa weeti. 4- Nde weetunoo fuu tawi Isa na darii juurdude maayo doon. Ndeen taalibbe been nji'i o de annditaay yallaa o wo Isa. 5- Ndeen Isa feekii be wi'i : Hey sukaabe am, on kebaay faa'e liingu ngootu nyaamon faa hannden na ? Be nootii be mbi'i be kebaay. 6- Isa wi'i be be limma fiil mabbe gere junngo nyaamo e laana mabbe be keban. Be njabi, be limmi. Nde be limmunoo fuu be kebi liyyi faa heewi, faa be kunngii foodude fiil oon be ngadda e laana ndiyam kaan. 7- Ndeen taalibbo mo Isa yidi oon haalani Simon Piyer wi'i : Inan joomi'en. Nde Simon Piyer nannoo inan joomi'en fuu, hooyi saaya muudum boornii sabu nde wonnoo ley maayo ngoon ndeenboornaaki. O fitti o jikki ley maayo ngoon. 8- Hono taalibbe heddinoobe been du kedii na cummba laana kaan na pooda fiil gondudo e liyyi faa heewi oon faa ka battitii. Be mboddaano e njoorndi ndagu pi'e keme didi nii. 9- Nde be njottinoo fuu be njippii be tawi yulbe keewbe bodeeji coy, liyyi ina njowii dow majje. Buuru du na dakkii doon. l0- Nde be ngarnoo fuu Isa wii be kooya liyyi, di be nanngi joonin diin be ngadda. 11- Wakkati muudum Simon Piyer naati laana kaan habbiti fiil oon e laana kaan heddii na fooda. Ko foodata dum fuu liyyi mawdi hemre e capande joy e tati ngoni ley toon. Faa o yottii e njoorndi. No liyyi diin teddirnoo nii fuu fiil oon seekaaki. 12- Isa wii be be ngara be pumma. De faa'e taalibbo gooto suusaay yamde o wo o moye, sabu ibe anndi gorko o'o woorataa Isa. 13- Ndeen Isa battitii e mabbe hooyi buuru oon e liyyi diin hokki mono mabbe fuu feccere. 14- Ni wonnoo koyde tati Isa na funta e taalibbe muudum be gilla iirtii hakkunde maaybe.
15- Nde be timminnoo nyaamde fuu, Isa wi'i Simo Piyer : Simon, bii Yonas, wo a horsinam faa buri no taalibbe be'e korsiniri kam nii na ? O nootii o wi'i : Ada anndi mido yi0i maa. De Isa nootii wi'i : Ndelle nduraa sukaabe'am be. 16- O yamtindii Piyer o wi'i : Simon, bii Yonas, a horsinam na ? O wi'i : Ada anndi mido yidi maa. 17- De Isa nootitii wi'i : Ndelle nduraa sukaabe'am be. Tataberde majjum Isa yami o : Simon, bii Yonas, ada yidi kam na ? Piyer wi'i : Ada anndi joomam mide yidi maa sanne, sabu ko woni e ley bernde am fuu ada anndi. No Piyer nootorii ni wo dow bernde mettunde sabu o yamii dum koyde tati. Ndeen Isa nootii o wi'i : Ayyo, nduraa sukaabe am be.
18- Ndeen Isa rewtini haala wi'i Piyer : Goonga e goonga kaalanammaami. Nde laatinodaa jokolle ndeen, a lalindoto kabbodaa kumol maada, njahaa to kaajadaa fuu. De mide haalene, nde naywudaa fuu, kanaa pooccaa juude maa de goddo habbene kumol maa, de yaare to njiddaa yaade. 19- Isa haaliraaynaa haala ka faa o holla yimbe no Piyer maayrata de Laamdo heba teddineede e mayde Piyer. Nde o haalunoo haala ka fuu, o wi'i Piyer : Njokkaa laawol am jonkaa.
20- Isa e Simon Piyer na njahada. Simon Piyer kaa yeeyii gada ga, yi'i taalibbo mo Isa yiduno oon ina wara gada mubben. Taalibbo oon, kam woni nde be nyaamannoo nyaamdu Juuldaandu Mawndu wahii dakkol bernde Isa lamndii moy woni taalibbo jammbotoodo oon. 21- Nde Simon Piyer yiinoo o fuu, lamndii wi'i : Jooman, noye o'o le sakitortoo ? 22- Isa nootii o wi'i : Nde mi wadan de o wuura faa mi warta du wanaa haaju maa. Aan kaa jokkam tan. 23- Nde o haalunoo haala kaan fuu, heddii yimbe jokkube Isa ina nduira ley na mbi'a taalibbo mo Isa yiduno oon maayataa.De Isa le,wi'aay Simon Piyer taalibbo oon maayataa de wi'aaynaa dum : Faysi taalibbo oon wuuri faa o warti, wanaa haaju Piyer. 24- Taalibbo oon kam seedii wakkati Isa wonnoo adunaaru de winndi dum fuu. Miden tennyorii du seedaango makko wo goonga. 25- Sabu na heewi kulleeji goddi di Isa wannoo e wakkati mudum di mbinndaaka ley dewtere nde'e. Si ko o wannoo dum fuu winndanooma fuu dewte deen keyyataa e ley adunaaru.